Masalimo 44 - Chiyawo Bible

Lipopelo lyakuŵenda citetelo

Kwa jwakwimbisya nyimbo. Ndakatulo ja ŵanace ŵa Kola.

¹ Ŵalakwe Mlungu, uwe twapikene ni mapikanilo getu, acinangolo ŵetu ŵatusalile ya masengo giŵagatesile ŵalakwe pa masiku ga jemanjajo kalakala.

² Ŵalakwe ni mkono wawo ŵatopwele ŵandu ŵa ngosyo sine, nambo acinangolo ŵetu ŵatamice mcilambo cawo. Ŵalakwe ŵajilagasisye mitundu jine ja ŵandu, nambo acinangolo ŵetu ŵapele ulukosyo.

³ Jemanjajo nginasumula cilambo ni upanga wawo, nganapunda pangondo mwamacili gawo. Nambo ŵapundile ni macili ga ŵalakwe Mlungu, ligongo ŵalakwe ŵaliji nawo pampepe ndaŵi syosope.

⁴ Ŵalakwe ali mwenye jwangu ni Mlungu jwangu, ŵalakwe ŵampundisye Yakobo* pa ngondo.

⁵ Mwa cikamucisyo ca ŵalakwe twakang'andile amagongo ŵetu.

⁶ Pakuŵa nganguwukulupilila ukunje, atamose upanga ŵangu ngaŵa mkungulupusya.

⁷ Nambo ŵalakwe atukulupwisye uwe kwa amagongo ŵetu, ni ŵandu ŵakuŵengana ni uwe, ŵatesisye soni.

⁸ Mwamacili ga Mlungu tukupoka masiku gose, tucatogolela kwa yaka yosope.

⁹ Nambo ŵalakwe atujasile ni kutucembulusya uwe, nganalongana nawo ŵa ngondo ŵetu.

¹⁰ Ŵalakwe akundile kuti amagongo ŵetu atutoposye ni amagongo ŵetu apatile yindu yiyaliji yetu.

¹¹ Ŵalakwe atupelece uwe mpela ngondolo syakuja kuwulajidwa, atupwilingenye uwe pasikati pa mitundu ja ŵandu.

¹² Ŵalakwe ŵasumisye ŵandu wawo pa mtengo wakucipa, mwakuti nganawusaka mtengo wapenani.

¹³ Ŵalakwe atutesile ŵandu ŵakusambuka kwa ŵandu ŵatuŵandikene nawo, ŵandu ŵatusyungulile akutuseka ni kutujalusya.

¹⁴ Ŵalakwe atutesile kuŵa ŵandu ŵakusambuka pasikati pa ŵandu ŵa mitundu jine,* ni ŵandu akutuseka pasikati pa acimjetu.

¹⁵ Lisiku lililyose ngusaliwona kuti ndili mundu jwangali mate, ngope jangu jikugwa ligongo lya soni,

¹⁶ pakugapikana maloŵe ga ŵakunyosya ni gaŵakundukana, ni soni kwa ŵandu ŵakumbenga une.

¹⁷ Yosopeyi yitugwilile uwe, atamose kuti nganitwaliŵalila ŵalakwe, soni nganitukasa cilanga* cawo.

¹⁸ Mtima wetu nganiwuwujila munyuma, ni sajo syetu nganisileka kwenda mwitala lyawo,

¹⁹ nambo ŵalakwe ŵatucanyandile ni kutuleka mcipi, pasikati pa makule mcipululu.

²⁰ Tukaliŵalile lina lya Mlungu jwetu, kapena kutambasukula makono getu ni kulambila milungu ja cilendo,

²¹ ana Mlungu ngimkanayimanyilila yeleyi? Pakuŵa akumanyilila yakusisika yosope ya mu mtima.

²² Nambo ligongo lya ŵalakwe tukuwulajidwa lisiku lyosope, pameso pawo tukuwoneka mpela ngondolo syakuja kuwulajidwa.

²³ Ajimuce, ŵalakwe AMBUJE.* Ligongo cici akugona? Atame mesope, akatujasa.

²⁴ Ligongo cici ŵalakwe atutundumalile? Ligongo cici ayiliŵalile yisawusyo yetu ni kulaga kwetu?

²⁵ Pakuŵa tugwile mluwundu; cilu cetu cigonile mwitaka.

²⁶ Ajimuce, ni ayice kutukamucisya. Atukulupusye ligongo lya cinonyelo cawo cangamala.