Masalimo 42 - Chiyawo Bible

BUKU JAŴILI (Masalimo 42—72) Lipopelo lya mundu jwakutama ku cilambo ca cilendo

Kwa jwakwimbisya nyimbo. Ndakatulo ja ŵanace ŵa Kola.

¹ Mpela mbaŵala jikusapumasika kusosasosa lusulo lwa mesi gakusisima, myoyo soni ni mwele mtima ŵangu muwukwasosela ŵalakwe Mlungu jwangu.

² Mtima ŵangu ukwete njota jakwasosa ŵalakwe Mlungu jwa cijumi; Ana tiyice cakaci pameso pa ŵalakwe Mlungu?

³ Ngulila musi ni cilo, ngacipasya kose cakulya cilicose, ŵandu akumbeceta une acitiji, “Mlungu jwenu ali kwapi?”

⁴ Mtima ŵangu ukusapweteka pingusakumbucila yakala, pinaliji mkwenda ni ŵandu ŵajinji, pakwalongolela ku Nyumba ja AMBUJE,* paliji pana ŵandu ŵajinji, acijimbaga ni kupeleka malumbo kwa Mlungu.

⁵ Ligongo cici mkukola canasa m'mwe mtima ŵangu? Ligongo cici mkulaga myoyo mkati mwangu. Mwakulupilile Mlungu, pakuŵa tinjalumba soni ŵelewo; ŵelewo ali cikamucisyo cangu ni Mlungu jwangu.

⁶ Une masile kwasa mtima, ni ligongo lyakwe ngwakumbucila ŵalakwe Mlungu pindili mcilambo ca Yolodani, ku Helimoni ni Kwitumbi lya Misala.

⁷ Mesi gakuŵilikuka mwamacili kuja kwakusokoka, kugungumila ni kulindima kwa mesi kukutesya woga. Matumbela genandi ni gamakulungwa gakunditimisya une.

⁸ Nambo AMBUJE akusalosya cinonyelo cakwe cangamala lisiku ni lisiku; ni cilo tinjijimba nyimbo jakwe, ni kupopela kwa Mlungu jwakumba umi.

⁹ Nguwusya kwa Mlungu, lwala lwangu kuti, “Ligongo cici andiŵalile? Ligongo cici ngwenda ndili mkulila, ligongo lyakalalisya kwa m'magongo jwangu?”

¹⁰ Kunyosya kwa amagongo ŵangu kukusambweteka mpela liŵanga lyakuwa nalyo lya mcilu mwangu, pakusambusyaga ndaŵi syosope kuti, “Mlungu jwenu ali kwapi?”

¹¹ Ligongo cici mkukola canasa, m'mwe mtima ŵangu? Ligongo cici mkulaga myoyo mkati mwangu? Mumkulupilile Mlungu, pakuŵa tinjalumba soni ŵelewo, ŵali cikamucisyo cangu ni Mlungu jwangu.