Masalimo 41 - Chiyawo Bible

Lipopelo lya mundu jwakulwala

Kwa jwakwimbisya nyimbo. Salimo ja Daudi.

¹ Jwana upile mundu jwakusiŵaganicisya ŵakulaga, pakuŵa AMBUJE* tacimkulupusya mundu jwamti myoyo pa lisiku lya yipwetesi yakwe.

² AMBUJE tacimsamala ni kumsunga jwacijumi. Tacikolanjidwa jwana upile pa cilambo. AMBUJE ngasampeleka kwa amagongo wakwe kuti amtende yakusaka.

³ AMBUJE tacimkamucisya mundujo acilwalaga. Tacimposya yilwele yakwe yosope.

⁴ Sambano natite, “Conde AMBUJE andendele canasa, ambosye une, pakuti une nalemwecesye ŵalakwe.”

⁵ Amagongo ŵangu ŵakusosela yakusakala akusati, “Ana mundu jweleju taciwa cakaci, kuti tumliŵalile?”

⁶ Mundu jwakusayika kukundola une akusaŵeceta maloŵe gangali mate; mu mtima mwakwe akusaganisya yakusakala ya une, ni pakopoka, akusaja kuyiŵandisya.

⁷ Wosope wakumbenga une akusasongona ya une, akusaganicisya kuti yakusakala yingwilile ligongo lya kusakala kwangu.

⁸ Akusati, “Cimgwilile cilwele cakuwa naco, ngajimuka soni pele pagonilepo.”

⁹ Atamose mjangu jwapamtima junamkulupilile; juŵaliji mkulya pampepe ni une; anjimucile.

¹⁰ Nambo ŵalakwe AMBUJE, andendele canasa, ambosye kuti none nawucisye.

¹¹ Naga akundendela yeleyo timanyilile kuti none jwakwe akusanonyela; pakuŵa m'magongo jwangu nganambunda kose.

¹² Ŵalakwe tangamucisye ligongo lya kulupicika kwangu; ni andamice pameso pawo mpaka kalakala.

¹³ Acimbicikwe AMBUJE jwa Aisalaeli, kutandila sambano mpaka kalakala! Elo yiŵe myoyo! Elo yiŵe myoyo!