Masalimo 40 - Chiyawo Bible

Nyimbo jakwalumba AMBUJE

Kwa jwakwimbisya nyimbo. Salimo ja Daudi.

¹ Une najembeceye AMBUJE* ni mtima ŵakukulupilila kuti tacingamucisya. Ŵajinamile pasi ni kundolecesya une, ni ŵapikene kulila kwangu.

² Ŵangopwesye mwisimbo lyakogoya ni m'matope, ni ŵasiliŵatisye sajo syangu pa lwala, ni ŵanjendesye cenenepe.

³ AMBUJE ŵaŵisile nyimbo ja sambano mkamwa mwangu, nyimbo jakwe jakwalumba AMBUJE ŵangu. Ŵandu ŵajinji taciyiwona ni tiwucakola woga, ni tacikulupilila mwa AMBUJE.

⁴ Jwana upile mundu jwakwakulupilila AMBUJE, mundu jwangakusepucila ku milungu jakupanganya ni yala, kapena kupwatikana ni ŵandu ŵakusalambila milungu ja unami.

⁵ Ŵalakwe AMBUJE, Mlungu jwangu atutendele yakusimonjesya yejinji, ni atukolocesye yambone yejinji ya msogolo. Pangali jwine jwakulandana ni ŵalakwe; naga kuti nayilongosole ni kuyisala ya yeleyo, nganipakombola kuyiŵalanga ligongo lya winji wakwe.

⁶ Nginasaka mbopesi ni yakupeleka, nambo ŵalakwe ambele mapikanilo gakuti mbikanileje. Nginaŵenda mbopesi syakutinisya ni sya kuŵenda cikululucilo ca ulemwa.*

⁷ Kaneko natite, “Alole une ngwisa; mpela muyilembedwele m'buku ja malamusi.

⁸ Une ngusayinonyela kuyitenda yakusosa ŵalakwe, Mlungu jwangu; malamusi gawo gali mu mtima mwangu.”

⁹ Nalalicile ngani syambone sya umbone wawo pa msongano wawukulungwa; alole, nganisiŵa pakamwa pangu, mpela mwakumanyilila ŵalakwe AMBUJE.

¹⁰ Nganisisa mu mtima mwangu ngani ja cikulupusyo ca une namsyene. Mbele ndili mkuŵeceta ya kulupicika kwawo ni ya cinonyelo cawo cangacenga.

¹¹ Akatyosya kwa une canasa cawo, ŵalakwe AMBUJE, cinonyelo cawo cangamala ni kulupicika kwawo yisunjeje ndaŵi syosope.

Lipopelo lyakuŵenda cikamucisyo

¹² Pakuŵa yisawusyo yejinji yisyungulile, yakulemwa yangu yisyungulile, kwakuti ngingupakombola kulola pakulupucila, uli wejinji kusipunda umbo sya mu mtwe ŵangu, mwakuti sambano njasile mtima.

¹³ Angulupusye, conde, ŵalakwe AMBUJE, akangamale kungamucisya une.

¹⁴ Ŵandu ŵele ŵakusaka kusumula umi ŵangu, ŵatesye soni ni kwasokonesya kwene. Ŵele ŵakusaka kumbweteka awujile panyuma ni kuŵa ŵangacimbicikwa.

¹⁵ Wakamule woga ni syatende soni pakuŵa alepele, ŵandu ŵakunjamila une kuti, “Eya! Eya!”

¹⁶ Nambo wosope ŵakwasaka ŵalakwe, asengwe ni kusangalala mwa ŵalakwe. Ŵakucinonyela cikulupusyo cawo asale kuti, “AMBUJE ali ŵakulungwa mnope.”

¹⁷ Uneji ndili jwakulaga ni jwangali cingwete; nambo AMBUJE akusangumbucila. Ŵalakwe ali ŵakungamucisya ni mkulupusyo jwangu. Akakokoŵa kwisa kukungamucisya ŵalakwe Mlungu jwangu.