Masalimo 4 - Chiyawo Bible

Lipopelo lya ligulo lyakuŵenda cikamucisyo

Kwa jwakwimbisya nyimbo. Ajimbile yida yakwimbila ya ngonji. Salimo ja Daudi.

¹ Anjanje une pingwalilila, ŵalakwe Mlungu, ŵakunjenjela, ŵalakwe ŵangamucisye pinaliji m'yisawusyo. Andendele canasa nipo alipikane lipopelo lyangu.

² Jemanja ŵandumwe, ana timunjalusye une mpaka cakaci? Mpaka cakaci timyinonyele yayili yangali mate, ni kusosa ya unami?

³ Nambo m'manyilile kuti AMBUJE* alisagulile ŵagoloka kuti aŵe ŵakwe; soni akusambikana pa ndaŵi jingwaŵilanga.

⁴ Mtetemele mcitendaga woga ni kuleka kulemwa; mganisyeje mnope mu mtima mwenu pimkugona, mcitamaga jii pamalo genu pa ndaŵi jimkugona.

⁵ Mpelece mbopesi syagoloka kwa AMBUJE, ni kuŵika cikulupi cenu mwa jwalakwejo.

⁶ Apali ŵajinji ŵakusati, “Conde AMBUJE atupe yambone yejinji. Atulole AMBUJE ni kututendela canasa.”

⁷ Nambo lukondwa luŵambele une, lwakupunda ŵandu ŵakwete tiligu ni finyo jwejinji.

⁸ Pingugona pasi, ngugona mu mtendele; Pakuŵa ŵalakwe jika AMBUJE, akusunga une mwa mtendele.