Masalimo 38 - Chiyawo Bible

Lipopelo lya mundu jwakulaga

Salimo ja Daudi ja mbopesi jakukumbusya.

¹ Akandumbilila ni kunjamuka, ŵalakwe AMBUJE.* Akapya mtima ni kumba cilango.

² Pakuŵa asomile une ni mipamba jawo, nipo mkono wawo undwinyicisye une pasi.

³ Mcilu mwangu mwangali macili ligongo lya ukali wawo; mwangali kose macili m'mawupa mwangu ligongo lya ulemwa* wangu.

⁴ Ulemwa* wangu undiŵisye msingu wangu, ukusitopa mpela msigo wakupunda macili gangu.

⁵ Maŵanga gangu gawosile ni gakununga ligongo lyakuloŵela kwangu.

⁶ Une mbindice mgongo, ligongo lyakwinama mnope, masile macili. Ngusajenda ndili mkulila lisiku lyosope.

⁷ Pakuŵa cilu cangu cikwamba kasanya; cilu cangu nginicikola macili.

⁸ Ndili jwam'male ligongo lya kulwalika. Nguwuwula ligongo lyakulaga mu mtima.

⁹ Ŵalakwe AMBUJE akuyimanyilila yosope yinguyisosa, ni ŵalakwe akusapikana yosope yakudandawula yangu.

¹⁰ Mtima ŵangu ukugundagunda, macili gamalile, ni ngingupakombola kulola cenene.

¹¹ Acambusanga ŵangu ni acimjangu akwima kwakutalikangana ni une, ligongo lya ulwele ŵangu; acalongo acimjangu akwima kwakutalicila.

¹² Ŵandu ŵakusosa umi ŵangu akundejela ngonji; ŵakusaka kumbweteka, akuŵeceta yakunjonanga, lisiku lililyose akusaganicisya yakundenda ciswamba.

¹³ Nambo une ndili mpela mundu jwangapikana ndili mpela mundu jwangaŵeceta.

¹⁴ Elo, ndili mpela mundu jwangapikana ligongo ngingupakombola kwanga kandu, pakuŵeceta ni une.

¹⁵ Nambo une ngwalindilila ŵalakwe AMBUJE; Ŵalakwe ali AMBUJE ni Mlungu jwangu jutacinjanga.

¹⁶ Pakuŵa ngusapopela kuti, akasiŵakunda jemanjajo kuti asangalale, ŵandu ŵakunyosya une pakumbona kuti ngugwa ligongo lyakutelesya.

¹⁷ Pakuŵa une ndili ciŵandika kugwa, ni ngupikana kupweteka ndaŵi syosope.

¹⁸ Ngwiticisya kusakala kwangu; ngudandawula ligongo lya yakulemwa yangu.

¹⁹ Amagongo ŵangu ali ŵamacili, ŵakusacilila umi ŵangu ali ŵajinji, ŵakumbenga une pangali ligongo.

²⁰ Ŵandu ŵele ŵakumbucisya yakusakala m'malo mwa yambone ali amagongo ŵangu; ligongo lyakuti une ngusatenda yindu yambone.

²¹ Akandeka jikape, ŵalakwe AMBUJE, Mlungu jwangu, akandalicila une.

²² Ajanguye kungamucisya une, ŵalakwe AMBUJE, Mkulupusyo jwangu.