Masalimo 37 - Chiyawo Bible

Ya kumala kwakwe kwa ŵandu ŵakusakala ni ŵandu ŵambone

Salimo ja Daudi.

¹ Mkasimdandawula ni ŵandu ŵakutenda yakusakala; mkisimwakumbila jemanjajo ŵakutenda yakusakala.

² Jemanjajo mwangakaŵa tacijumula mpela manyasi; ni taciwa mpela yakumela yayikunyala.

³ Mwakulupilile AMBUJE* ni kutenda yambone; tamani mcilambo ni kuŵa mu mtendele.

⁴ Sangalalani mwa AMBUJE, ni tampe yiwukusaka mtima mwenu.

⁵ Mlipelece mwasyene kwa AMBUJE, mwakulupilile ŵelewo, nipo tacimsamalila.

⁶ Tacilosya pakulanguka ungalemwa wenu, ni goloka kwenu tikuciŵala mpela musi.

⁷ Tamani jii ni kwalindilila AMBUJE mwangadandawula; mkasimlilagasya ni mundu jwele yakwe yikumjendela cenene, atamose kuti jwelejo akupakombola kutenda yangalumbana.

⁸ Mkapya mtima ni kutumbila; mkatenda kose yeleyi, pakuŵa ngiyimpindulila kandu.

⁹ Ŵandu ŵangalumbana tacijonasika, nambo ŵandu ŵakukulupilila AMBUJE tacipocela cilambo kuti ciŵe cawo.

¹⁰ Mwangakaŵilisya ŵangalumbana ngasawoneka pa cilambo, jemanja timcasosa nambo ngisimwawona.

¹¹ Nambo ŵakulitulusya tacipocela cilambo kuti ciŵe cawo, ni taciŵa pa mtendele ŵakupundanganya.

¹² Mundu jwangalumbana akumpanganila ciswamba, ni kumtawunila meno, mundu jwambone.

¹³ Nambo AMBUJE akusamseka mundu jwangalumbanajo; ligongo akusamanyilila kuti tajonasice mwangakaŵilisya.

¹⁴ Ŵangalumbana akuswekula upanga wawo ni kuwuta ukunje wawo. Kwawulaga ŵandu ŵangali cakwete, ni konanga umi ŵaŵele ŵakutenda yambone.

¹⁵ Nambo upanga wawo tucisoma mitima jawo ni mawukunje gawo tigaciposokocela m'myala mwawo.

¹⁶ Yindu yamnono yakwete mundu jwambone, yili yambone; kuyipunda yindu yambone yejinji yakwete mundu jwangalumbana.

¹⁷ Pakuŵa AMBUJE tacigatyosya macili ga ŵandu ŵangalumbana; ni kwagosa ŵelewo ŵali ŵambone.

¹⁸ AMBUJE akuwusamalila umi wa ŵandu ŵambone, ni cilambo capasi ticiciŵa cawo kwa yaka yosope.

¹⁹ Pa ndaŵi ja yisawusyo ngasalaga kose, pa ndaŵi ja sala, tacikola yakulya yejinji.

²⁰ Nambo ŵangalumbana tacijonasika; amagongo ŵa AMBUJE akusanyala mpela maluŵa gamwitinji, jemanjajo tacityoka mpela lyosi.

²¹ Mundu jwangalumbana akusanonyela kongola nambo akulepela kuwusya; nambo mundu jwagoloka ali jwakusalala mtima ni jwa kupeleka.

²² Ŵandu ŵele AMBUJE ŵiŵapele upile tacipocela cilambo; nambo ŵele ŵiŵalwesile tacijonasika.

²³ AMBUJE akusalongolela wende ŵa mundu jwagoloka, ni kumcenjela mundu jwele matala gakwe gakuŵa gakumnonyelesya jwalakwe.

²⁴ Atamose agwe ngasawulala; ligongo AMBUJE akusamkamula mkono wakwe.

²⁵ Kutandilila ucanda ŵangu mpaka ucekulu wangu, ngininawone AMBUJE ali kumleka mundu jwambone, atamose ŵanace ŵakwe kuŵa ŵakuŵenda yakulya.

²⁶ Mu ndaŵi josope mundu jwambone akusapeleka mwa umbone mtima ni akusakongosya mwalulele, ŵanace ŵakwe akuŵa upile ŵakwe.

²⁷ Myilece yangalumbana, ni mtende yambone; mwakuti timtame kwa yaka yosope mcilambo.

²⁸ Pakuŵa AMBUJE akucinonyela cilungamo, ni ngajasa ŵandu ŵakwe ŵakulupicika; ŵagoloka tacasamalila kwa yaka yosope, nambo jwalakwe tacajonanga ŵanace ŵangalumbana.

²⁹ Ŵandu ŵambone tacipocela cilambo, ni tacitama mwelemo kwa yaka yosope.

³⁰ Mundu jwambone akusaŵeceta ya lunda, ni pakamwa pakwe pakusakopoka cilungamo.

³¹ Jwelejo akusunga mu mtima mwakwe malamusi ga Mlungu, ni ngakusatenganyika pakwenda mu umi awuno.

³² Mundu jwangalumbana akusamsonda mundu jwambone; aciganicisyaga yakumwulaga jwalakwejo.

³³ Nambo mundu jwambonejo, AMBUJE ngasamleka jika m'makono mwa amagongo ŵakwe; ngasakunda kuti pakulamula magambo gakwe gamgomele.

³⁴ Mwakulupilile AMBUJE kugasunga matala gakwe; tacimkwesya ni kumpa cilambo kuti ciŵe cenu, ni timcawona ŵandu ŵangalumbana ali mkonasika.

³⁵ Nam'weni mundu jwangalumbana ali mkupoka; ni kulikwesya mpela mkungusa wa ku Lebanoni.

³⁶ Panyumba pakwe, pakupita soni, nam'weni kuti pangali, atamose kuti namsosilesosile nambo ngininamsimana kose.

³⁷ Mumlolecesye mundu jwangali ulemwa* ni jwagoloka; ni timyiwone kuti mundu jwali jwa mtendele akwete yisukulu yejinji.

³⁸ Nambo ŵandu ŵakulemwa tacijonasika; pampepe ni yisukulu yawo.

³⁹ Cikulupusyo ca ŵandu ŵambone cikusatyocela kwa AMBUJE, jwalakwe ali kwakutilila ŵandu pa ndaŵi ja yisawusyo.

⁴⁰ AMBUJE akwakamucisya ni kwapokasya ŵelewo; akwapokasya m'makono mwa ŵandu ŵakusakala ni kwakulupusya. Pakuŵa ŵanduwo akuŵika cikulupi cawo mwa AMBUJE.