Masalimo 36 - Chiyawo Bible

Ya kusakala kwa mundu

Kwa jwakwimbisya nyimbo. Salimo ja Daudi, jwakutumicila jwa AMBUJE.

¹ Ulemwa* ukusaŵeceta mu mtima wa mundu jwangalumbana; jwanganakola kose woga ni Mlungu mu nganisyo syakwe.

² Pakuŵa akusalinyenga msyene mu nganisyo mwakwe, kwakuti kulemwa kwakwe ngakukumanyilila ni kuŵengana nako.

³ Maloŵe ga pakamwa pakwe gangalumbana ni ga unami, ngakupatenda kose yayili yalunda ni yambone.

⁴ Jwelejo akuganicisya yangalumbana naga agonile cilo, akwenda mwitala lyanganiliŵa lyambone, ni cangalumbana ngakucikana.

Ya umbone wa Mlungu

⁵ Ŵalakwe AMBUJE,* cinonyelo cawo cili cangamala, cikwika mpaka kwinani, ni kulupicika kwawo kukwika mpaka ku mawunde.

⁶ Kulungamika kwawo kukulolecela mpela matumbi gamalewu, kulamula kwawo kuli mpela Nyasa jakusokoka. Ŵalakwe AMBUJE akwasamalila ŵandu ni yinyama yakwe.

⁷ Cinonyelo cawo Mlungu cili cangamala cili ca mtengo mnope, ni ligongo lyakwe ŵandu ŵawo akusatilila kusi kwa mapapiko gawo.

⁸ Akusiŵalisya yakulya yakunakana m'Nyumba mwawo, ni akwamwesya mesi kutyocela mu lusulo lwana upile.

⁹ Umi wosope uli wa kutyocela kwa ŵalakwe; ni ligongo lya lilanguka lyawo uwe tukuliwona lilanguka.

¹⁰ Akaleka kwanonyela ni cinonyelo cawo cangamala, ŵandu ŵakwamanyilila ŵalakwe, ni kwatendela yambone ŵagoloka mtima.

¹¹ Akakunda sajo sya ŵandu ŵakulikwesya kuti andiŵatile, kapena makono ga ŵandu ŵangalumbana kuti andoposye.

¹² Alole, kwagwilile ŵandu ŵangalumbana, ŵalakwe ŵagwisisye pasi jemanjajo ni ngakupakombola kwimuka.