Masalimo 35 - Chiyawo Bible

Lipopelo lyakuŵenda cikamucisyo

Salimo ja Daudi.

¹ Alimbane nawo ŵandu ŵele ŵakulimbana ni une, ŵalakwe AMBUJE,* amenyane nawo ŵele ŵakumenyana ni une.

² Ajigale lipende lyakunjinjilicisya, ni ayice kukumbokasya une.

³ Aswekule upanga ni lipanga; ni kulimbana nawo ŵandu ŵakunguya une. Awusalile mtima ŵangu kuti, “Une ndili mkulupusyo jwenu.”

⁴ Syatesye soni jemanjajo ni ajaluce ŵele ŵakuwusosa umi ŵangu; awujilile ni kutila wele ŵandu ŵakupangana konanga umi ŵangu.

⁵ Jemanjajo aŵe mpela masapi gakuwululuka ni mbungo, pakutopolwa ni lilayika lya AMBUJE.

⁶ Litala lyawo liŵe lya cipi ni lyakutelesya; pakutopolwa ni lilayika lya AMBUJE.

⁷ Pakuŵa ŵandejele lwawu pangali ligongo kose; ni ŵasolele lisimbo une mundu jwangalemwa.

⁸ Nambo ajonasice mwacisisimucisya, atanjile mu lwawu lwakulitejela acimsyene, agwile mwisimbo lyakusola acimsyene.

⁹ Tinjisangalala ni mtima ŵangu wosope, ni kwalumba ŵalakwe AMBUJE, kusangalala kuti angulupwisye.

¹⁰ Tinjisangalala ni mtima ŵangu wosope, ni kusala kuti, “Ŵani ŵa mpaka alandane nawo ŵalakwe AMBUJE, ŵalakwe ŵakumkulupusya mundu jwangali macili kwa mundu jwamacili mnope, ŵalakwe ŵakumkulupusya mundu jwangali macili ni jwakulaga kwa mundu jwakumsumula yindu yakwe?”

¹¹ Mboni syakusakala sinjimucilile, sikumbusya yindu yanganguyimanyilila une kose.

¹² Sikumbucisya une cakusakala m'malo mwa cambone; mtima ŵangu ugumbele ni canasa.

¹³ Nambo jemanjajo pa ndaŵi jiŵalwalaga, une nalitakwisye ciguduli kulosya kudandawula nalikalalicisye ngalya cakulya; napopesile mtwe ŵangu uli cinamile pamtima.

¹⁴ Mpela mungamtendele canasa m'mbusanga jwangu kapena mlongo mjangu. Najesile cilikusicile mpela mundu jwakulila malilo ga mamagwe, ndili mkulila cinamile.

¹⁵ Nambo une pa ndaŵi jinaliji m'yisawusyo, jemanjajo ŵasongangene mli mkusangalala, mwasongangene wosope pampepe, ŵandu ŵangalumbana ŵele ŵanganinamanyilila ni ŵaliji mkusinjilila.

¹⁶ Ŵanduwo ŵaliji mkusambula mwa cipongwe, acimemenaga meno gawo.

¹⁷ Ana tatame mpaka cakaci ali mkwamba kuyilola yeleyi, ŵalakwe AMBUJE? Angulupusye une ku ŵandu ŵakusaka kunjonanga, awukulupusye umi ŵangu ku gele masimbaga.

¹⁸ Ni tinjatogolela ŵalakwe pa msongano wawukulungwa; tinjalumba ŵalakwe pa cinamtindi ca ŵandu ŵawo.

¹⁹ Akasiŵakunda amagongo ŵangu ŵakunyenga; kuti asangalale ligongo lya yisawusyo yangu. Akasiŵakunda wakumbenga pangali ligongo, andole camumbali mwakunyosya.

²⁰ Pakuŵa jemanjajo ŵangaŵeceta yamtendele; nambo akwamba ganicisya yakwalambucisya ŵandu, ŵakunonyela ya mtendele mcilambo.

²¹ Akuseka mwakugumila acitiji, “Aa! Meso getu gayiweni yiyatendekweyo.”

²² Nambo ŵalakwe AMBUJE ayiweni yeleyi, akatama jii, akatalikangana ni une ŵalakwe AMBUJE.

²³ Ajimuce ŵalakwe AMBUJE, kuti anjenjele pa magambo gangu, Ŵalakwe Mlungu jwangu, ni AMBUJE ŵangu.

²⁴ AMBUJE, AMBUJE ŵangu, ligongo lyagoloka kwawo, alamule kuti une nganindemwa, akasiŵakunda amagongo ŵangu kuti asecelele ligongo lya yisawusyo yangu.

²⁵ Akakunda jemanjajo kuti asale mu mtima mwawo kuti, “Elo, yeleyo ni yitusacileje.” Akajila kuti, “Twagomece.”

²⁶ Ŵandu ŵakusangalala pakumbona une ndili pa yisawusyo, ŵatesye soni, ni ŵasokonesye kwene. Ŵele wakuganicisya kuti ambundile une, atende soni ni kunyosedwa.

²⁷ Nambo ŵele ŵakusacilila kuti pakulamulwa ngasimanikwa une ni magambo, mwa cisangalalo agumile ni aŵe ŵakusengwa, asale masiku gosope kuti, “AMBUJE ali ŵakulungwa; akusanonyelwa kulola kuti jwakutumicila jwawo yimjendele cenene.”

²⁸ None tilalicile ya goloka kwawo, ni tinalumbe ŵalakwe masiku gosope.