Masalimo 34 - Chiyawo Bible

Nyimbo jakulumba umbone wa Mlungu

Salimo ja Daudi. Ŵaliji ali alambucisye kutenda mpela jwa masoka pameso pa Abimeleki. Pandaŵiji ni kuti Abimeleki ali amtopwesye Daudi.

¹ Tinjatogolela AMBUJE* ndaŵi syosope; pakamwa pangu tipacalumba ŵelewo mwangalecesya.

² Ngupoka mwa AMBUJE, umi wangu wosope, ŵandu ŵali m'yisawusyo apikanicisye ni kusangalala!

³ Jenesyani pampepe ni une ya ukulungwa wa AMBUJE; kwende pampepe tulilumbe lina lyawo.

⁴ Napopesile kwa AMBUJE, ni ŵanjanjile, ŵangulupwisye une ku yosope yinayijogopaga.

⁵ Ŵakulaga pakulola kwa AMBUJE; ngope syawo syasangalele, nganatenda soni.

⁶ Mundu jwakulagaju jwalisile, nipo AMBUJE ŵampikene, ni ŵamkulupwisye m'yisawusyo yakwe yosope.

⁷ Malayika ga AMBUJE gakusiŵacenjela ŵandu ŵelewo ŵakumjogopa AMBUJE; ni akusiŵakulupusya.

⁸ Mlinje ni timlole kuti Mlungu ali jwambone; jwana upile mundu jwakutilila kwa AMBUJE.

⁹ Mwajogope AMBUJE, jemanja, ŵandu ŵakwe ŵaswela mtima, pakuŵa ŵakwajogopa AMBUJE ngacikwasoŵa cindu.

¹⁰ Atamose masimba gakusasoŵa cakulya ni kutama ni sala, nambo ŵandu ŵakwasosa AMBUJE ngacikwasoŵa cilicose cambone.

¹¹ Myice ŵanangu, ni mumbikane, ni une tinamjiganye jemanja kwajogopa AMBUJE.

¹² Ŵani mwa jemanja akuwusosa umi, ni kusosa kutama masiku gamajinji; kuti asangalale ni yindu yambone?

¹³ Naga mkuwusacilila umi, mkasiŵeceta yangalumbana, pakamwa penu pakasipaŵeceta ya unami.

¹⁴ Tukukani pa yakusakala, ni kutenda yambone, sosani mtendele ni kuwukuya.

¹⁵ Meso ga AMBUJE gakusalola mundu jwagoloka, ni akukupikana kulila kwakwe.

¹⁶ Nambo AMBUJE akwatumbilila ŵandu ŵakutenda yangalumbana, ŵanduwo naga awile, citemape akuliŵalicika.

¹⁷ Pakulila ŵandu ŵagoloka kuti ŵakamucisye; AMBUJE akwapikana ni kwakulupusya m'yisawusyo yawo.

¹⁸ AMBUJE akusaŵa ciŵandika ni ŵandu ŵa mtima wekasice, akwakulupusya ŵelewo ŵajasile mtima.

¹⁹ Mundu jwambone akuyiwona yisawusyo yejinji, nambo AMBUJE akusamkulupusya jwelejo m'yisawusyo yakwe yosope.

²⁰ AMBUJE akusacisamalila cilu ca mundujo, pangali liwupa lili lyose likusatemanguka.

²¹ Cakusakala cikumwujila msyene; mundu jwele jwakuŵengana ni mundu jwagoloka tacipata yisawusyo.

²² AMBUJE akusawombola umi ŵa ŵakutumicila ŵakwe, pangali mundu jwalijose jwakutilila kwa AMBUJE jutacipata yisawusyo.