Masalimo 33 - Chiyawo Bible

Nyimbo jakwalumba AMBUJE

¹ Sangalalani mwa AMBUJE,* jemanja ŵakulungamika, kusyene ŵakulungama akuŵajilwa kutogolela.

² Mwalumbe AMBUJE ni yida yakwimbila ya ngonji; mwajimbile ŵelewo ni yida yakwimbila ya ngonji likumi.

³ Mwajimbile ŵelewo nyimbo ja sambano; kodolani ngonjisyo mwa umanyilisi, ni kugumila mwakusangalala.

⁴ Pakuŵa maloŵe ga AMBUJE gali gagoloka; ni masengo gawo gosope akusagatenda mwakulupicika.

⁵ AMBUJE akutenda ya cilungamo ni kulamula mwagolosya. Akusalosya cinonyelo cawo cangamala, pa cilambo cosope capasi.

⁶ AMBUJE ŵaŵecete nipo ya kwinani yapanganyidwe, yosope yayili kweleko yapanganyidwe piŵaŵecete jwalakwejo maloŵe gakwe.

⁷ Ŵagasongenye pampepe mesi ga m'nyasa syakusokoka, ni ŵasiŵicile malile kuti mesi gakasepucila.

⁸ Cilambo cosope capasi cimjogope AMBUJE; ŵandu wosope ŵakutama pa cilambo capasi atende woga ni jwalakwe.

⁹ Pakuŵa jwalakwe ŵaŵecete ni yatendekwe, mwa kulamula kwakwe yosope yawonecele.

¹⁰ Yakusaganicisya ŵandu ŵa mitundu, AMBUJE akusayigalawusya kuŵa yangali mate kose, nganisyo syawo syosope akusigalawusya kuŵa syacabe.

¹¹ Nambo yakusaganisya AMBUJE yikusatendekwa ndaŵi syosope, nganisyo sya mu mtima mwakwe sikusatamilicika kwa yaka yosope.

¹² Wana upile mtundu wa ŵandu wele AMBUJE ali Mlungu jwawo; ŵandu ŵele AMBUJE ŵiŵasagwile kuti aŵe ŵakweŵakwepe.

¹³ AMBUJE ali kwinani akusalola pasi ni kwawona ŵandu wosope.

¹⁴ Kutyocela kwele kwakutama pa citengu ca ucimwene, akusiŵalola ŵandu wosope ŵakutama pa cilambo capasi.

¹⁵ Jwalakwe jwakupanganya mitima ja ŵandu wosope, ni jwele jwakusalolecesya yosope yakutenda.

¹⁶ Mwenye ngakukulupuka ligongo lyakulimbangana kwa ŵa ngondo ŵakwe. Jwa ngondo ngakukulupuka ligongo lyakuti akwete macili mnope.

¹⁷ Ngaŵicila mtima pa mahaci gangondo kuti tiwupunde, ligongo ngajikupakombola kumkulupusya mundu, atamose hacijo jikole jamacili gamajinji.

¹⁸ AMBUJE akusiŵalolecesya ŵandu ŵakumpikanila, ni ŵakwembeceya cinonyelo cakwe cangamala.

¹⁹ Jwalakwe akuyitenda yeleyi kuti ŵakulupusye ku ciwa; ni kuwukulupusya umi wawo pa ndaŵi ja cilala.

²⁰ Umi wetu ukwembeceya AMBUJE; ligongo jwalakwe ali jwakutukamucisya ni jwakutucenjela.

²¹ Mwa Jwalakwe mitima jetu jikusangalala, pakuŵa tukukulupilila mu lina lyakwe lyeswela.

²² Cinonyelo cawo cangamala, ŵalakwe AMBUJE, ciŵe ni uwe mpela yitukuti pakwakulupilila ŵalakwe.