Masalimo 32 - Chiyawo Bible

Lipopelo lyakwiticisya ulemwa nambo soni ya cikululucilo

Ndakatulo ja Daudi.

¹ Jwana upile mundu jwele ulemwa* wakwe ukululucidwe, jwele ulemwa wakwe usimacice.

² Jwana upile mundu jwele AMBUJE* ngakumŵalanjila yakulemwa yakwe, ni mu mtima mwakwe mwangali yakulambusya.

³ Pinaliji mkaninjiticisye yakulemwa yangu, cilu cangu caliji cangali macili ligongo lyakuŵuŵula cilo cosope.

⁴ Pakuŵa cilo ni musi mkono wakwe wawusito ŵasajice nawo pa une, kwakuti macili gangu gamasile, mpela mugakunyalila masamba ni lyuŵa lya ndaŵi ja cawu.

⁵ Nambo pinajiticisye ulemwa wangu kwa ŵalakwe, nganisisa ungalumbana wangu. Tinjiticisye ulemwa wangu kwa ŵalakwe, nipo ŵalakwe ŵangululucile yakulemwa yangu yosope.

⁶ Ni ligongo lyakwe mundu jwalijose jwakusamala ya ŵalakwe, apopele kwa ŵalakwe mu ndaŵi jali m'yisawusyo. Naga akutenda myoyo, ni atamose mesi ga cikumba cacikulungwa ca yisawusyo gayice, ngasigamyicilila jwelejo.

⁷ Ŵalakwe ali malo gangu gakulisisa; ŵalakwe akusanjenjela ndaŵi ja yisawusyo. Ni ligongo lyakwe ngusajimba nyimbo syakutogolela cikulupusyo cawo.

⁸ AMBUJE akuti, “Tinjimanyisya ni kumjiganya litala lyakuŵajilwa kwenda m'mwejo. Tinjimlosya ni kumlolela.

⁹ Mkaŵa ŵakuloŵela mpela haci kapena bulu, yakutenda yakuyilongola ni cisyano cakusacitaŵilila mkamwa ni pa mtwe pakwe, pakuŵa naga ngakuyitaŵilila yinyamayo ngisiyimpikanila.”

¹⁰ Ŵandu ŵangalumbana akusasimana yakupweteka yejinji. Nambo mundu jwakukulupilila AMBUJE, cinonyelo ca AMBUJE cikusamsyungulila.

¹¹ Jemanja ŵimli ŵagoloka, mŵe ŵakusengwa nipo msangalale pa ligongo lya yamtendele AMBUJE. Jemanja wosope ŵa mtima ŵakulungama, gumilani mwakusengwa.