Masalimo 31 - Chiyawo Bible

Lipopelo lyakulosya kulupilila Mlungu

Kwa jwakwimbisya nyimbo. Salimo ja Daudi. *

¹ Ngutilila kwa ŵalakwe AMBUJE* akasakunda kuti ndende soni nambo angulupusye, Ŵalakwe ali Mlungu jwagoloka ngupopela kuti angulupusye!

² Atejele mapikanilo kuti ambikane! Ajanguye kungulupusya! Ŵalakwe aŵe lwala pakutilila une, ni lipupa lyangu lyakulimba, lyakungulupusya.

³ Ŵalakwe ali lwala lwangu ni ŵakunjenjela ŵangu, ni ligongo lya lina lyawo alongolele ni kunjongolela.

⁴ Angolokole ku lwawu lwandejele, pakuŵa kwa ŵalakwe ni kwakutilila kwangu.

⁵ Ngupeleka umi wangu m'makono mwawo, ŵalakwe AMBUJE ŵakulupicika awombwele une.

⁶ Ŵalakwe akwaŵenga ŵele ŵakulambila tumilungu twakupanganya ni yala; ngwakulupilila ŵalakwe AMBUJE.

⁷ Tinjikondwa ni kusangalala ligongo lya cinonyelo cawo cangamala, ligongo ŵalakwe ayiweni yisawusyo yangu; ni ayimanyilile yisawusyo yangu kuti yili yekulungwa.

⁸ Ni ŵalakwe nganambeleka m'makono mwa amagongo ŵangu, nambo ambisile pa malo pakutambasukuka.

⁹ Asalalile mtima, ŵalakwe AMBUJE, pakuŵa ndili muyakusawusya; meso gangu gayimbile ligongo lya canasa mu mtima mwangu ni mcilu mwakwe mugumbele yisawusyo.

¹⁰ Umi wangu ukumala ni kudandawula, ni yaka yangu yikumala ni kuwuwula. Macili gangu gakusapela ligongo lya yipwetesi yangu ni mawupa gangu ngagakulimba.

¹¹ Amagongo ŵangu wosope akusambula, acalongo acimjangu akumbona mpela cindu cakunyalaya. Ŵandu wakumanyigana nawo akunjogopa. Ŵandu ŵakumbona mu msewu akundila.

¹² Andiŵalile une mpela mundu jwam'we; ngulaga mpela ciŵiga cacikasice.

¹³ Ngwapikana ŵandu ŵajinji acisongonaga yakusakala ya une, yakogoya yayisyungwile une posepose. Jemanjajo akupangana yakunjimucilila une acitendaga mtemela wakuti ambulaje une.

¹⁴ Nambo cikulupi cangu cili mwa ŵalakwe AMBUJE; ngusati, “Ŵalakwe ali Mlungu jwangu.”

¹⁵ Masiku gangu gali m'makono mwawo, angulupusye m'makono mwa amagongo ŵangu, ni mwa jemanjajo ŵakundagasya.

¹⁶ Amlole jwakutumicila jwawo ni canasa; angulupusye une ligongo lya cinonyelo cawo cangamala.

¹⁷ Akakunda kuti ndende soni, ŵalakwe AMBUJE, ligongo mbopesile kwa ŵalakwe; nambo ŵandu ŵakusakala atende soni, ajawule ku malembe mwangali lisegwe.

¹⁸ Wosope ŵakulikwesya ni ŵa unami, ŵele ŵakuŵeceta mwa mwano ni kwanyosya ŵandu ŵakulungamika ŵatamice jii.

¹⁹ Umbone wawo uli wawukulungwa, wele wakwasunjila ŵandu ŵakwajogopa ŵalakwe. Umbone uŵatendele ŵandu ŵakutilila kwa ŵalakwe, jwalijose ayiweni yeleyi.

²⁰ Akwasisa pa malo pele pali ŵalakwe kuti wacenjele ku yiswamba ya amagongo wawo. Akwasunga cenene ni kwacenjela ku ŵandu atakukangana nawo.

²¹ Acimbicikwe AMBUJE, pakuŵa andosisye mwakusimonjeka cinonyelo cawo cangamala, pinaliji mpela msinda wawusyungulilidwe ni ŵandu wa ngondo.

²² Une wangamwile woga ni naŵecete kuti, “Andopolele kwakutalikangana ni ŵalakwe.” Nambo ŵambikene kuŵenda kwangu, pinalilile ŵalakwe kuti angamucisye.

²³ Mwanonyele AMBUJE, jemanja ŵandu ŵaswela mtima, AMBUJE akwasunga ŵakulupicika, nambo akwapa cilango ŵakulikwesya.

²⁴ Mŵeje ŵamacili ni ŵakulimba mtima jemanja wosope ŵimkwakulupilila AMBUJE.