Masalimo 30 - Chiyawo Bible

Lipopelo lyakutogolela

Salimo ja Daudi. Nyimbo jakwimba pakuwugulila Nyumba ja AMBUJE.

¹ Tinjalumba, ŵalakwe AMBUJE,* pakuŵa andyosisye m'yisawusyo, nganakunda kuti amagongo ŵangu asangalale, pakuwona kuti ndili m'yisawusyo.

² Nalilile kwa ŵalakwe, AMBUJE, Mlungu jwangu, kuti angamucisye, ni ŵalakwe ŵambosisye;

³ naliji jwamjawule ku cilambo ca ŵawe, nambo ŵalakwe AMBUJE ambucisye soni umi wangu.

⁴ Jimbani nyimbo syakwalumba AMBUJE, jemanja wosope ŵaswela mtima. Mkumbucile yele yatesile Ŵaswela, ni kwatogolela!

⁵ Kutumbila kwawo kukusaŵa kwa kandaŵi kakajipi, nambo umbone wakwe uli wa mpaka kalakala. Misosi komboleka kucesya kugwa cilo cosope, nambo kundaŵi kukusayika kusangalala.

⁶ Nambo une, panayiweni kuti yindu yinjendele cenene; “Ngasindenganyika kose.”

⁷ Ligongo lya mtima wawo wambone, ŵalakwe AMBUJE, ŵandamice une mpela litumbi lyakulimba. Nambo piŵasisile une ngope jawo, nipo une najogwepe.

⁸ Kwa ŵalakwe AMBUJE, nalilile, ni naŵendile canasa cawo kuti,

⁹ “Ana tacipata cici pa ciwa cangu naga ngwinjila mwilembe? Ana une pitinjisanduka luwundu, tinjipakombola kwalumba ŵalakwe? Ana tinjipakombola kulalicila ya kukulupicika kwawo?

¹⁰ Ambikane ŵalakwe AMBUJE, ni kundendela canasa, ŵalakwe AMBUJE. Aŵe ŵakungamucisya ŵangu.”

¹¹ Akusandwisye kulila kwangu kuti kuŵe kuŵina, ŵalakwe atyosisye kudandawula kwangu ni kumba kusangalala.

¹² Myoyo ngatama jii; nambo nalumbe ni mtima wangu wosope. AMBUJE Mlungu jwangu; tinjalumba ŵalakwe yaka yosope.