Masalimo 3 - Chiyawo Bible

Lipopelo lya kundaŵi lyakuŵenda cikamucisyo kwa Mlungu

Salimo ja Daudi, pa ndaŵi jiŵatilaga Abisalomu mwanagwe.

¹ Ŵalakwe AMBUJE,* amagongo ŵangu ali ŵajinji mnope, ŵakunjimucila une ali ŵajinji;

² Ŵandu ŵajinji pakuŵeceta ya une akusatiji, “Mlungu jwangakulupusya.”

³ Nambo ŵalakwe AMBUJE, ali ŵakunjenjela, akumba macili gakujipunda ngondo ni angwesisye pa citengu cangu.

⁴ Ngwalilila ŵalakwe AMBUJE kuti angamucisye, kutyocela mwitumbi lyawo lyaliswela akunjanga une.

⁵ Ngupakombola gona, cilo cosope mwa mtendele. Ngwimuka soni kundaŵi pakuŵa ŵalakwe AMBUJE akunjenjela.

⁶ Ngangogopa kose winji wa amagongo ŵangu ŵasyungulile une mbali syosope.

⁷ Ajimuce; conde AMBUJE, angulupusye une, Mlungu jwangu! Ŵaputile makofi amagongo ŵangu, ni ŵagakusile meno ga ŵandu ŵakusakala.

⁸ Cikulupusyo cikutyocela kwa ŵalakwe AMBUJE upile wawo uŵeje mwa ŵandu ŵawo.