Masalimo 29 - Chiyawo Bible

Maloŵe ga AMBUJE mu mbungo jamacili mnope

Salimo ja Daudi.

¹ Mwalumbe AMBUJE,* jemanja ŵakutama kwinani; mgalumbe macili gawo ni lumbili lwawo.

² Mwalumbe AMBUJE mlumbili lwa lina lyawo, mwalambile AMBUJE mu umbone wawo wawuswela.

³ Liloŵe lya AMBUJE lipikanice pacanya pa mesi; Mlungu jwa lumbili alindime ni liloŵe lyakwe ligungumile pacanya pa nyasa jajikulungwa.

⁴ Liloŵe lya AMBUJE lili lya macili, liloŵe lya AMBUJE lili lyalikulungwa kusyene.

⁵ Liloŵe lya AMBUJE likusatemangulanya yitela ya mikungusa; AMBUJE akusatemangulanya mikungusa ja ku Lebanoni.

⁶ Akusalitenganya Litumbi lya Lebanoni kuti lisumbe mpela ŵanace ŵa ng'ombe, ni Litumbi lya Helimoni mpela mwanace jwa cipembele.

⁷ Liloŵe lya AMBUJE likoposya malamba ga moto.

⁸ Liloŵe lya AMBUJE likutenganya cipululu; AMBUJE akutenganya cipululu ca Kadeshi.

⁹ Liloŵe lya AMBUJE likutenganya yitela ya mtundu ni kupulula masamba gosope ga yitela ya mu ukweti; ni jwalijose jwali m'nyumba jakwe akugumila kuti, “Lumbili luŵe kwa Mlungu!”

¹⁰ AMBUJE akulamulila nyasa syosope, ali mkutama pa mpando wakwe wa ucimwene kwa yaka yosope.

¹¹ AMBUJE akupeleka macili kwa ŵandu ŵakwe ni kwapa upile ni mtendele.