Masalimo 28 - Chiyawo Bible

Lipopelo lyakuŵenda cikamucisyo

Salimo ja Daudi.

¹ Ngwaŵilanga ŵalakwe AMBUJE,* lwala lwangu, akatenda mpela kuti ngakumbikana. Naga ŵalakwe akuŵa jii, tinjilandana ni ŵandu wakwinjila kumalo ga ŵawe.

² Apikane kuŵenda kwangu pingwalilila ŵalakwe kuti angamucisye, pingukwesya makono gangu, pakwalambila ŵalakwe kumalo gawo gamaswela.

³ Akasandyosya une pamo ni ŵandu ŵakusakala, ŵandu ŵakutenda yangalumbana; ŵele ŵakusaŵeceta ya mtendele ni acalongo acimjawo, nambo mitima jawo jigumbele ni uŵengani.

⁴ Ŵawucisye ŵanduwo mwakulandana ni masengo gawo, payakusakala yatesile. Ŵape cilango mwakulandana ni yangalumbana yatesile, ŵape mbote jakwenela kupocela.

⁵ Ligongo lyakuti jemanjajo ngakusamala masengo ga AMBUJE, atamose yele yiŵapanganyisye ŵalakwewo myoyo tacapa jemanjajo cilango ni kwajonanga jemanjajo mpaka kalakala.

⁶ Acimbicikwe AMBUJE, pakuŵa apikene maloŵe gakuŵenda kwangu.

⁷ AMBUJE ali macili gangu ni ŵakunjenjela ŵangu, mbisile mtima wangu wosope pa ŵelewo. Angamucisye, myoyo mtima ŵangu ukusangalala, nipo ngusatogolela ni nyimbo syangu.

⁸ AMBUJE ali macili gakwegamila ŵandu ŵakwe, ni kwakutilila mwenye jwakwe jwamsagwile.

⁹ Kulupusyani ŵandu ŵenu, AMBUJE, mwape upile ŵandu ŵimwasagwile. Mŵe mkucinga jwawo, ni kwasamala jemanjajo mpaka kalakala.