Masalimo 27 - Chiyawo Bible

Lipopelo lyakwalumba AMBUJE

Salimo ja Daudi.

¹ AMBUJE* ali lilanguka lyangu ni cikulupusyo jwangu, tinajogope ŵani? AMBUJE ali ŵakunjenjela ŵangu, ana tindendele cici woga?

² Ŵandu ŵakusakala pakundendela ya ukoleko kuti ambulaje, tacikuŵala nipo tacigwa.

³ Atamose ŵa ngondo asyungulile une, mtima wangu ngasiwujogopa; atamose ngondo jiyice kulimbana ni une, nambo ngasindeka kukulupilila.

⁴ Mbendile cindu cimope kwa AMBUJE; cindu cakusosekwa mnope; cakuti ndameje m'Nyumba ja AMBUJE masiku gosope ga umi wangu; kuti ngasangalale ni kuwuwona umbone wawo AMBUJE, ni kuti nalambileje ŵalakwewo m'Nyumba mwawo.

⁵ Pandaŵi ja yisawusyo tacisisa ni kunjenjela une mkati mwa Nyumba jawo, tacisunga m'Nyumba jawo tacimbika une pacanya pa lwala lwalulewu.

⁶ Tinjapunda amagongo ŵangu ŵasyungulile une, tinjipeleka mbopesi m'Nyumba jawo ndili mkugumila mwakusengwa. Tinjijimba nyimbo jakwalumba AMBUJE.

⁷ Ambikane ŵalakwe AMBUJE, pingwalilila mwakwesya maloŵe, andendele canasa ni kunjanga une.

⁸ Pajatu ŵalakwe ŵatite, “Yikani mulambile,” une najanjile kuti, “AMBUJE, tinalambile.”

⁹ Akasasisila une ngope jawo! Akandopola une jwakutumicila jwawo ali atumbile; ŵalakwe ŵaliji mkungamucisya, akanjasa, akandeka jikape ŵalakwe Mlungu, mkulupusyo jwangu.

¹⁰ Atamose kuti baba ŵangu ni mama ŵangu andece jika, ŵalakwe AMBUJE tacisamalila.

¹¹ Anjiganye yakusaka ŵalakwe AMBUJE, kuti nayitende; ni alongolele mwitala lyambone, ligongo ngwete amagongo ŵajinji.

¹² Akambeleka m'makono mwa amagongo ŵangu; pakuŵa mboni sya unami sinjimucile, soni sikunjogoya.

¹³ Ngukulupilila kuti tinjiwuwona umbone wawo AMBUJE; mcilambo ca ŵacijumi.

¹⁴ Myoyo mwakulupilile AMBUJE. Mŵeje ŵamacili, ni ngajasa mtima. Mwakulupilile AMBUJE.