Masalimo 24 - Chiyawo Bible

Mwenye Jwamkulungwa akwisa

Salimo ja Daudi.

¹ Cilambo capasi ni yosope yayili mwelemo yili yawo AMBUJE;* cilambo ni wosope ŵakutama mwelemo ali ŵakwe.

² Pakuŵa ŵalakwe ŵaciŵisile cilambo capasi pa nyasa syekulungwa; ŵacitamice cilambo pa sulo syakusokoka.

³ Ana ŵani takwele kwawula Kwitumbi lya AMBUJE? Ana ŵani tacijinjila m'Nyumba jawo jajiswela?

⁴ Ŵelewo pewo ŵakusatenda yambone ni yala yawo, ni kuganisya yambone mu mtima mwakwe. Jwele jwangakuganicisya ya unami, soni jwangalumbila mwa unami.

⁵ Tacipocela upile kutyocela kwa AMBUJE; nipo Mlungujo tacilamula kuti jwele mundujo jwangali ulemwa.*

⁶ Ŵandu ŵamti myoyo ni ŵakwasaka Mlungu, ŵele ŵakusayika kukumlambila Mlungu jwa Yakobo.

⁷ Myitute yipata ya msinda, mwugule matanga gakalakalago, kuti mwenye jwa lumbili ajinjile.

⁸ Ana mwenye jwa lumbilijo nduni? Jwalakwejo ali AMBUJE, ŵamacili ni ŵakulimbangana; AMBUJE nijo jwakulimbangana pa ngondo.

⁹ Myitute yipata ya msinda, mwugule matanga gakalakalago, kuti mwenye jwa lumbili ajinjile.

¹⁰ Ana mwenye jwa lumbilijo nduni? Jwalakwejo ali AMBUJE Ŵamaciligosope. Ali mwenye jwamkulungwa.