Masalimo 22 - Chiyawo Bible

Pa ndaŵi jakulagasidwa Daudi akudandawula, akupopela ni kumtogolela Mlungu

Kwa jwakwimbisya nyimbo. Salimo ja Daudi pakukuya nyimbo jele wimbe wakwe akusatiji kuti: Mbaŵala jakumasikusiku.

¹ Mlungu jwangu, Mlungu jwangu, ana ligongo cici andesile une? Ana ligongo cici ngakungamucisya, ana ligongo cici ngakugapikana maloŵe gakuwuwula kwangu?

² Mlungu jwangu, une ngwalilila musi, nambo ŵalakwe ngakunjanga, ngwalilila cilo, nambo nganguwusimana mtendele.

³ Nambo Ŵalakwe ali ŵaswela, ŵalakwe ali mwenye jwakulumbidwa ni Isalaeli.

⁴ Acinangolo ŵetu ŵaŵisile cikulupi pa ŵalakwe; elo, ŵakulupilile ŵalakwe, ŵalakwe ŵakulupwisye.

⁵ Ŵalilile ŵalakwe ni ŵakulupwisye; ŵakulupilile mwa ŵalakwe ni nganajasa mtima kose.

⁶ Nambo une ndili nyongolosi, nganimba mundu kose; jwakunyosyekwa ni kwaluka ni ŵandu.

⁷ Wosope ŵakumbona akuseka une; akukoposya ndumi syawo ni kupukunya mitwe jawo;

⁸ akuŵeceta kuti, “Mwajegamile kwa AMBUJE,* nambi ligongo cici ngakumkulupusya? Naga AMBUJE akumnonyela m'mwejo, ana ligongo cici ngakumcenjela?”

⁹ Nambo ŵalakwe ni uŵasacile kuti mbagwe. Une ngwakulupilila ŵalakwe. Ŵandelite cenene une ndili likandi.

¹⁰ Une najegamile mwa ŵalakwe kutandilila lisiku linapali; nipo ŵalakwe ŵaliji Mlungu jwangu.

¹¹ Akatalikangana ni une; pakuŵa yisawusyo yiŵandicile; ni pangali jwalijose jwakungamucisya.

¹² Amagongo ŵajinji ŵasyungulile une mpela ng'ombe sya mikambako; Wosope ŵasyungulile une, mpela ng'ombe sya mikambako sya ukali syakutyocela ku Bashani.

¹³ Akwasamukula kukamwa mpela masimba; acitongolaga ni ŵakusaka kumbaculanya une.

¹⁴ Macili gangu gapite, mpela mesi gakwiticila pasi, mawupa gangu gosope gatyosile m'malumbiko; mtima wangu unyelenyendwice mpela lipula mkati mwangu.

¹⁵ Kungulo kwangu kujumwile mpela lupale, ni lulumi lwangu lunyambatile mwinani mwa mkamwa mwangu, ni ŵalakwe andesile mluwundu; kuti mbwile mwelemo.

¹⁶ Likuga lya ŵandu ŵakusakala lisyungulile une, mpela mpingo wa m'mbwa akuyicilila une; akupaculanya makono gangu ni sajo syangu.

¹⁷ Mawupa gangu gosope gakopocele kusa, amagongo ŵangu ŵala akwamba kundolecesya; akusangalala pakumbona kuti ndili m'yisawusyo.

¹⁸ Akugaŵana yakuwala yangu acimsyenepe ni kuyicesela juga.

¹⁹ Conde AMBUJE akatalikangana ni une, ŵalakwe ali ŵakunjenjela une, ajanguye kwisa kukumbokasya.

²⁰ Awukulupusye umi wangu ku upanga, awupokasye umi wangu ku macili ga m'mbwa.

²¹ Ambokasye une kukamwa kwa lisimba, ni awukulupusye umi wangu ku wakulaga ku misengo ja njati.

²² Myoyo tinjasalila acalongo acimjangu, yayitesile ŵalakwe. Tinjalumba ŵalakwe pa misongano ja ŵandu ŵawo.

²³ Tinjiti, “Jemanja ŵamkujogopa AMBUJE, mwalumbe ŵalakwewo. Ŵanace wosope ŵa Yakobo* mwacimbicisye AMBUJE, mwalambile ŵalakwewo, jemanja wosope ŵanace ŵa Isalaeli.

²⁴ Pakuŵa Jwalakwe nganamnyosya kapena kumkana mundu jwakulaga; nganamtundumalila mundu jwakulaga, nambo ŵampikene piŵadandawile.”

²⁵ Tinjalumba ŵalakwe pa msongano wawukulungwa ligongo lya yosope yandendele une. Yilanga yinaŵisile tinjiyitenda pameso pa ŵandu wosope ŵakwajogopa ŵalakwe.

²⁶ Ŵakulaga tacilya mwakwikuta, ŵele ŵakumsaka AMBUJE mnope, taciŵa mkwalumba! Mitima jenu jiŵe ni umi ndaŵi syosope.

²⁷ Ŵandu ŵa mitundu josope tacakumbucila ni kugalawucila kwa AMBUJE, ni maŵasa gosope tigacalambila ŵalakwe.

²⁸ Pakuŵa ulamusi uli wawo AMBUJE, Jwalakwe akwalamulila ŵandu ŵa mitundu josope.

²⁹ Ŵandu wosope ŵakulikwesya tacajinamila AMBUJE. Ŵandu wosope ŵakuwa nombe nawo tacimtindiŵalila.

³⁰ Yisukulu ya m'mawuja tiyicatumicila ŵalakwewo; ŵandu taciŵeceta ya AMBUJE ku yisukulu ya m'mawuja.

³¹ Kwa ŵandu ŵimkinapagwe tacasalila ya ukulupusyo wawo; kuti, “AMBUJE ni uŵakulupwisye ŵandu ŵakwe.”