Masalimo 21 - Chiyawo Bible

Kwalumba AMBUJE ligongo lyakwapunda amagongo

Kwa jwakwimbisya nyimbo. Salimo ja Daudi.

¹ Mwenye akusengwa, ligongo ŵapele macili ŵalakwe AMBUJE,* akusengwa mnope ligongo ŵamkamucisye kwapunda amagongo ŵakwe.

² Mumpele jwelejo yakusaka ya mtima wakwe, ŵalakwe ŵamjanjile kuŵenda kwakwe.

³ Ŵalakwe ŵayice kwa jwelejo ni upile wejinji, ni ŵawecice cisindi ca golidi* jwambone pa mtwe pakwe.

⁴ Ŵaŵendile umi wawulewu ni ŵalakwe ŵampele; ampe masiku gamajinji.

⁵ Lumbili lwakwe luli lwekulungwa ligongo lya cikamucisyo ca ŵalakwe; ŵampele ucimwene wawukulungwa ni wa ucimbicimbi.

⁶ Upile wa ŵalakwe uli pa jwalakwejo kwa yaka yosope; ali ŵakusengwa mnope ligongo ŵalakwe ali nawo.

⁷ Pakuŵa mwenye akusakulupilila AMBUJE; ngasatenganyika, ligongo lya cinonyelo cawo cangacenga ca AMBUJE asyene macili gosope.

⁸ Ŵalakwe tacakamula amagongo wawo wosope, macili ga mkono wakwe ŵamacili tacakamula wosope ŵakwaŵenga Ŵalakwe.

⁹ Tacajonanga jemanjajo mpela moto wa mu ng'aso, pitaciwonecela ŵalakwe. AMBUJE tacamala jemanjajo mu ukali wakwe; nipo moto tiwucamala.

¹⁰ Mwenyewo tacajonanga ŵanace ŵawo pa cilambo capasi, ni yisukulu yawo tiyicimala pasikati pa ŵanace ŵa ŵandu.

¹¹ Naga jemanjajo akutenda mtemela, ni malindi gakwatendela ŵalakwe, nambo tacilepela.

¹² Timcaponya mipamba jemanjajo, ni taciwujila munyuma ni kutila.

¹³ Tukwalumba ŵalakwe AMBUJE, mu macili gawo gekulungwa! Tucijimba ni kugalumba macili gawo gamakulungwa.