Masalimo 20 - Chiyawo Bible

Lipopelo lyakuti mwenye apunde pa ngondo

Kwa jwakwimbisya nyimbo. Salimo ja Daudi.

¹ AMBUJE* amjanje m'mwejo pa ndaŵi jimli mu yisawusyo! Mlungu jwa Yakobo* amcinjilicisye m'mwejo!

² Amtumicisye m'mwejo cikamucisyo kutyocela kumalo gawo gamaswela, ni kumpa cikamucisyo kutyocela Kwitumbi lya Siyoni.*

³ Akunde kuyipocela yakupeleka yenu, ni akunde kujikumbucila mbopesi jakoca jenu.

⁴ Akunde kumpa yimkusosa mu mtima mwenu; amkamucisye kuti yosope yimliŵalile kuyitenda, yitendecekwe.

⁵ Kwende tululute mwakondwa ligongo lyakuti mwapundile amagongo ŵenu pa ngondo; tukwesye mbendela kumlumba Mlungu jwetu. AMBUJE ampe yosope yimŵendile.

⁶ Sambano ngumanyilila kuti AMBUJE tacimkamucisya mundu jwamsagwile kuŵa mwenye, tacimjanga jwalakwe kutyocela kumalo gakwe gamaswela kwinani, pakumpundisya mnope ni ligasa lyakwe lyamlyo.

⁷ Ŵane akuŵika cikulupi cawo pa mageleta ga ngondo ŵane mu macili ga mahaci gawo, nambo uwe tukuŵika cikulupi cetu mu macili ga AMBUJE Mlungu jwetu.

⁸ Jemanjajo tacikuŵala ni kugwa, nambo uwe tucijimuka ni kwima njoo!

⁹ Amkamucisye mwenye, kuti apunde pa ngondo, ŵalakwe AMBUJE. Atujanje patukwaŵilanga.