Masalimo 2 - Chiyawo Bible

Mwenye jwakusagulidwa ni Mlungu

¹ Ana ligongo cici mitundu ja ŵandu jikupangana ya kwimucila? Ana ligongo cici ŵandu akutenda malindi gangali mate?

² Ayimwene ŵawo akwimucila, ŵakulamula ŵawo akutenda mtemela, kusisyana ni AMBUJE* pampepe ni mwenye juŵamsagwile.

³ Jemanjajo akuti, “Kwende tugopole ma unyolo gawo, ni tutyoce mu ulamusi wawo.”

⁴ Kutyocela pa citengu cakwe kwinani AMBUJE agamba kwaseka ni kwanyosya jemanjajo.

⁵ Kaneko tacajamuka jemanjajo mwakutumbila, nipo tacajogoya mwakalipa.

⁶ “Une namsyene nimjinjisye kala mwenye jwangu,” jwalakwejo ali petumbi lyangu lyeswela lya Siyoni.

⁷ Mwenye akuti, “Une tinjijenesya yasasile AMBUJE. Ŵasalile kuti: ‘M'mwejo mli mwanangu; lelo une mbele mtati gwenu.

⁸ Naga mkuŵenda une, tinjijitenda mitundu josope; ni cilambo cosope kuŵa cenu.

⁹ Timcaswanya ni simbo ja cisyano, ni kwateketanya jemanjajo myipiciti mpela mwakusakasila ciŵiga.’ ”

¹⁰ Sambano, jemanja ayimwene mŵe ŵalunda, mlijiganye kutyocela pa lijiganyoli, jemanja ŵakulamula cilambo.

¹¹ Mwatumicile AMBUJE mwa woga, ni mwakutetemela;

¹² mwajinamile pa sajo syawo mwa kutetemela, kogopela kuti atakumtumbilila; myoyo m'mwejo komboleka kuwa mwakusisimucisya, ligongo ukali wawo ukusajanguya kolela. Ŵana upile ŵandu wosope ŵakutilila kwa AMBUJE.