Masalimo 19 - Chiyawo Bible

Lumbili lwa Mlungu mu yakupanganyidwa yakwe

Kwa jwakwimbisya nyimbo. Salimo ja Daudi.

¹ Yakwinani yikusajenesya ya lumbili lwa Mlungu; nipo lipananga likusalosya masengo ga magasa gakwe.

² Musi uliwose ukuŵeceta yeleyi ku musi ujakwe, ni cilo cilicose cikusalicisya ya lunda ku cilo cijakwe.

³ Pangali kuŵeceta pangali maloŵe galigose, maloŵe gawo gangapikanika kose.

⁴ Nambo utenga wawo ukusajendelecela pa cilambo cosope, maloŵe gawo gakusaja kwika mpaka kumbesi kwa cilambo. Mlungu ŵalitaŵile lyuŵa nyumba jakwe mwipananga;

⁵ lyuŵa likusakopoka kundaŵi mpela mlombela jwakusangalala; jwele jwakukopoka m'nyumba jakwe nipo likusajenda mwakondwa mpela mundu jwamacili.

⁶ Kopoka kwakwe likutandila kumbesi kwa mawunde, ni kusyungulila mpaka soni kumbesi jine ja mawunde, pangali cindu cilicose cakomboleka kutila kupweteka kwa lyuŵa.

Malamusi ga AMBUJE

⁷ Malamusi ga AMBUJE* gali gambone, gakusampa mundu umi wasambano, umbone wa AMBUJE uli wakulupicika wakwapa ŵandu wambape lunda.

⁸ Malamusi ga AMBUJE gali gagoloka, gakusengwasya mtima; Malamusi ga AMBUJE gali gasyene, gakusapeleka mtima wakupikanicisya.

⁹ Kwajogopa AMBUJE kuli kwambone, kuli kwacitamile kwa yaka yosope; majiganyo ga AMBUJE gali gakuwona ni gagoloka kusyene.

¹⁰ Gali gakusosekwa kujipunda golidi,* kujipunda mnope golidi jambone; gakunong'a kupunda uci atamose uci wa masyega.

¹¹ Malamusi genu gakungombelesya une jwakutumicila jwenu, pakugasunga ngusapocela mbote jajikulungwa.

¹² Ŵani ŵakupakombola kuyimanyilila yakulemwa yakwe? Andyocesye yakulemwa yangu yakusisika, ŵalakwe AMBUJE.

¹³ Akasakunda kuti une jwakutumicila jwawo niyitende yakulemwa melepe; akasakunda kuti ulemwawo undamule une, nipo une timbe jwambone ni jwangali magambo ga ulemwa* wawukulungwa.

¹⁴ Maloŵe gangu ni nganisyo syangu yijiticisidwe pameso pawo, Ŵalakwe AMBUJE, ali lwala lwangu ni mkulupusyo jwangu.