Masalimo 17 - Chiyawo Bible

Lipopelo lya mundu jwangalemwa

Lipopelo lya Daudi.

¹ Ŵalakwe AMBUJE,* alipikane lipopelo lyangu pingwaŵenda kuti andendele cilungamo. Atejele lipikanilo ku lipopelo lya mundu jwawo jwakulupicika.

² Tacindamula mwakusalalila une, pakuŵa ŵalakwe akumanyilila cacili cakulungamika.

³ Atamose awulinje mtima wangu, kapena kundolecesya cilo, naciŵa muno andolecesye camtuli, tasimane kuti jwangali ulemwa,* pakuti pakamwa pangu pangaŵeceta yangalumbana.

⁴ Nginguŵeceta yakusakala mpela mwakusatendela ŵane, soni ngininguya matala gawo ga ndewo; ligongo une ngukuya lilamusi lya ŵalakwe.

⁵ Wende wangu ndaŵi syosope njesile mwitala mwawo, nipo nginisokonecela kose.

⁶ Une ngupopela kwa ŵalakwe Mlungu, pakuŵa tacinjanga, myoyo agalawucile kwa une kupikana maloŵe gangu.

⁷ Acilosye canasa cawo pakutenda yakusimonjeka, ni kungulupusya une; ŵalakwe mkulupusyo jwa ŵandu ŵakwika kwa ŵalakwe pakutilila ku mkono wawo wamlyo; kutyocela ku yisawusyo ya amagongo wawo.

⁸ Asunje une mpela mwa mpaka atendele ni liso lya ŵalakwe asyene; asise une kusi kwa mapapiko gawo,

⁹ kuti ŵandu ŵakusakala, ŵakusosa kunjonanga akasambona, ngwamba amagongo ŵangu ŵakusyungulila une.

¹⁰ Nganakola mtima ŵa canasa, ni akuŵeceta mwakulikwesya.

¹¹ Jemanjajo asyungulile une sambano, kulikose kungugalawucila, acilindililaga lipesa lyakungwicisya pasi.

¹² Jemanjajo ali mpela lisimba, kulindilila une, acisacililaga kumbaculanya.

¹³ Ajimuce, ŵalakwe AMBUJE, asimane nawo ni kwapunda. Angulupusye une ni upanga wawo kwa ŵandu ŵangalumbana.

¹⁴ Ŵalakwe AMBUJE, angulupusye kwa amagongo ŵangu ni mkono wawo. Kwa ŵandu ŵele umi wawo ukwamba kusamalila ya pa cilambo. Ŵape yisawusyo ni yipwetesi yiŵasunjile jemanjajo, nombe yiŵe yakwanila kwa ŵanace ŵawo, mpaka tayilecele yisukulu yawo.

¹⁵ Nambo une tinjawona ŵalakwe, ligongo une nganindenda kose cakulemwa, patinjimuce tinjiŵa mundu jwakusengwa pakuwonegana ni ŵalakwe.