Masalimo 16 - Chiyawo Bible

Lipopelo lyakulosya kwakulupilila AMBUJE

Salimo ja Daudi.

¹ Asunje une, ŵalakwe Mlungu, pakuŵa ngutilila kwa ŵalakwe.

² Ngusinasalila AMBUJE* kuti, “Ŵalakwe ali AMBUJE ŵangu, yindu yosope yambone yingwete yikutyocela kwa ŵalakwe.”

³ Kuŵeceta ya ŵaswela mtima ŵakutama pa cilambo pano, ŵeleŵa ali ŵakucimbicika, soni ngwete nawo cinonyelo.

⁴ Ŵakuwutucila milungu jine, akuliwunjicila yisawusyo acimsyenepewo. Ngasimbeleka nawo mbopesi syawo sya miasi; kapena kukolanga mena ga milungu jawo.

⁵ AMBUJE, ali cipanje cangu, soni ŵalakwe akusamba yingusoŵa; sogolo jangu jili myala mwa ŵalakwe.

⁶ Yindu yambele une yili yambone kusyene, soni kwa une yili yakunonyelesya mnope.

⁷ Ngwalumba AMBUJE, ligongo akusalongolela une, mtima wangu soni ukusangalamusya une cilo cosope.

⁸ Ngumanyilila kuti AMBUJE ali ni une ndaŵi syosope; ali ciŵandika ni une, nipo pangali campaka cinjogoye une.

⁹ Myoyo ndili jwakusengwa ni kutogolela, nguliwona kuti kusyene ndili pambone,

¹⁰ ligongo ŵalakwe akunjinjilicisya une ku macili ga ciwa, pakuti natumicile ŵalakwe mwakulupicika ŵalakwe ngasakunda kuti jwakunonyelwa jwawo awole.

¹¹ Ŵalakwe akusandosya une litala lya ku umi, ngusasimana lukondwa pakuŵa ŵalakwe pakuŵa ali ciŵandika ni une. Tinjiŵa jwakusangalala kwa ndaŵi syosope.