Masalimo 15 - Chiyawo Bible

Ndamo jakumnonyelesya Mlungu

Salimo ja Daudi.

¹ Ŵalakwe AMBUJE,* ana ŵani ŵatajinjile m'Nyumba jawo? Ana ŵani ŵampaka apakombole kulambila petumbi lyawo lyeswela?

² Ali mundu jwakwenda mwangalemwa, jwakutenda yakulungamika ndaŵi syosope, jwele jwakuŵeceta yakuwona ni mtima wakuwona,

³ jwangakutenda yakusinjilila. Jwangakumtendela yangalumbana mjakwe kapena jwangakuŵeceta mbili jacabe ja mjakwe.

⁴ Mundu jwelejo ni jwakusiŵanyosya ŵandu ŵakumkana Mlungu, nambo akusiŵacimbicisya ŵandu ŵakwapikanila AMBUJE. Jwalakwejo ni jwakuyitenda yatesile cilanga,* atamose yipwetece camtuli.

⁵ Jwalakwejo ni jwele jwangakusakongosya cipanje cakwe kuti apate cakonjecesya ni jwangakusapocela capacisyepela kuti amlagasye mundu jwangalemwa. Mundu jwakutenda yinduyi pangali cindu cilicose citicicimtenganya.