Masalimo 149 - Chiyawo Bible

¹ Mwalumbe AMBUJE! Mwajimbile AMBUJE* nyimbo ja sambano; mwajimbile nyimbo jakwalumba, pa msongano ŵa ŵandu ŵakwe ŵaswela mtima.

² Isalaeli asangalale ni juŵapanganyisye, ŵandu ŵa mu msinda wa Siyoni* asangalale ni mwenye jwawo.

³ Alilumbe lina lyakwe aciŵinaga; amjimbile nyimbo jakunonyelesya ni ngoma ni cida cakwimbila ca ngonji.

⁴ AMBUJE akusasangalala nawo ŵandu ŵakwe, akasiŵacimbicisya ŵandu ŵakulitulusya, pakwapa macili gakwapunda amagongo ŵawo.

⁵ Ŵandu ŵakulupicika asangalale ni kupunda kwawo, ajimbe mwa lukondwa cilo cosope.

⁶ Ŵalumbe Mlungu ni maloŵe gakwesya mnope acijigalaga upanga wakutema kosekose m'makono gawo.

⁷ Kuti awucisye yisawusyo ngosyo sya cilendo, ni kujipa cilango mitundu jine ja ŵandu.

⁸ Ŵataŵe ayimwene ŵawo ni unyolo, ni ŵakulongolela ŵawo ni yisyano.

⁹ Kuti ŵape cilango mpela mwele Mlungu muŵalamulile. Lwelelu nilo lumbili lwa ŵandu wosope ŵakukulupilila AMBUJE. Mwalumbe AMBUJE!