Masalimo 148 - Chiyawo Bible

Yakupanganyidwa yosope yikwenela kumlumba Mlungu

¹ Mwalumbe AMBUJE!* Mwalumbe AMBUJE jemanja ŵimkutama kwinani, mwalumbe jemanja ŵimkutama mwipananga.

² Mwalumbe jemanja malayika ŵawo wosope. Mwalumbe jemanja makuga gosope ga ngondo ga kwinani.

³ Mwalumbe jemanja lyuŵa ni mwesi, mwalumbe jemanja ndondwa syosope syasikuŵala.

⁴ Mwalumbe jemanja cilambo cakwinani mnope, soni jemanja mesi ga gali pacanya mawunde.

⁵ Yosopeyo yililumbe lina lya AMBUJE, pakuŵa Jwalakwe ŵalamulile, ni yapanganyidwe.

⁶ Ŵayitamice m'malo mwakwe kuti yitame mpaka yaka yosope, ni ŵayipele lilamusi lyakuti alikuyeje.

⁷ Mwalumbe AMBUJE jemanja ŵimkutama pa cilambo capasi, jemanja yilombo ya m'mesi ni m'nyasa syosope syakusokoka,

⁸ jemanja moto ni matalila, mesi gekamulane ga mbee ni soni mawunde, m'mwe cimbunga ŵamkutenda yalamwile AMBUJE.

⁹ Jemanja matumbi ni yikwesya yosope, yitela ya yisogosi ni mikungusa josope,

¹⁰ jemanja nyama sya mwitinji ni syakulanga syosope, jemanja yindu yakwaŵa ni yijuni yaguluka,

¹¹ jemanja ayimwene ni ŵandu wosope ŵa pa cilambo capasi, jemanja acakulungwa ni ŵakulamula wosope ŵa pa cilambo capasi,

¹² jemanja acacanda pampepe ni aciŵali, jemanja ŵacekulupe ni ŵanace ŵakwe.

¹³ Wosope alilumbe lina lya AMBUJE! Pakuŵa lina lyawo jika lili lyakucimbicikwa, lumbili lwawo luli lwakupunda cilambo capasi ni ca kwinani.

¹⁴ AMBUJE ŵakwesisye ŵandu ŵakwe pakwapa macili. Ŵacimbicisye ŵandu ŵakwe wosope ŵaswela mtima, ŵanace ŵa Isalaeli, ŵandu ŵakwanonyela, Mwalumbe AMBUJE!