Masalimo 147 - Chiyawo Bible

Kumlumba Mlungu Jwamaciligosope

¹ Mwalumbe AMBUJE! Cili cindu cambone kwajimbila malumbo Mlungu jwetu; cili cindu cakusangalasya kumjimbila jwalakwejo.

² AMBUJE akutaŵa Yelusalemu, akwasonganya Aisilayeli ŵiŵapwilingene.

³ Akwaposya ŵandu ŵakudandawula ni kugataŵa maŵanga gawo.

⁴ Akusiŵalanga ndondwa musiŵelele; syosope akusipa mena.

⁵ AMBUJE ŵetu ali ŵakulungwa, soni ŵamacili gamajinji, lunda lwawo lwangali malile.

⁶ Akusiŵakwesya ŵakulitulusya nambo akusiŵagwisya pasi ŵandu ŵangalumbana.

⁷ Mwajimbile AMBUJE ni kwatogolela, mumjimbile Mlungu jwetu nyimbo jambone ni cida cakwimbila ca ngonji.

⁸ Akusayiwunicila ya kwinani ni mawunde, akusapeleka ula kwitaka, akusipusya manyasi pa matumbi.

⁹ Akusapeleka cakulya ku yinyama, soni ku ŵanace ŵa makungulu pakulilila yakulya.

¹⁰ Ngakwegamila ku macili ga haci, atamose macili ga ŵa ngondo ngakusamala kose.

¹¹ Nambo AMBUJE akusasangalala ni ŵandu ŵakumjogopa; ni ŵakusakulupilila cinonyelo cakwe cangamala.

¹² Mwalumbe AMBUJE, m'mwe Yelusalemu. Mumlumbe Mlungu jwenu, m'mwe Siyoni.*

¹³ Pakuŵa akusalimbisya yipata yenu. Akwapa upile ŵandu ŵenu.

¹⁴ Jwalakwe akusapeleka mtendele m'malile mwa cilambo cenu, akusamjikutisya ni utandi wa tiligu wakutililika.

¹⁵ Pakupeleka lilamusi pa cilambo capasi, yakusaŵecetayo yikusatendecekwa mwacitemacitema.

¹⁶ Akusagwisya matalila gamti mpela manyunya gamaswela, akumwasanya lipundugulu mpela liwu.

¹⁷ Akusagwisya matalila mpela maganga. Ana ŵani tapakombole kupimilila kusisima kwakwe?

¹⁸ Yikusanyelenyenduka, pati alamwile kuti yityoce, akusapujisya mbungo, m'mesi gakusajilima.

¹⁹ Akusam'manyisya Yakobo* maloŵe gakwe, akusamjiganya Isalaeli malamusi ni majiganyo gakwe.

²⁰ Nganatendeje yeleyi ni mtundu ŵine uliwose ŵa ŵandu; ŵangakugamanyilila majiganyo gakwe. Mwalumbe AMBUJE!