Masalimo 146 - Chiyawo Bible

Nyimbo ja Malumbo kwa Mlungu Mkulupusyo jwetu

¹ Mwalumbe AMBUJE!* Mwalumbe AMBUJE, m'mwe umi ŵangu!

² Tinalumbe AMBUJE umi wangu wosope. Tinjimbe nyimbo syakumlumba Mlungu jwangu umi ŵangu wosope.

³ Mkasimwakulupilila ayimwene, kapena ŵandu ŵane ŵangakupakombola kukamucisya.

⁴ Palikutyoka lipuje lyosope mcilu mwa mundu, mundujo akasawujila kwitaka, ni yindu yiŵasakaga kuyitenda, yikusamala lisiku lilyolyo.

⁵ Jwana upile mundu jwele cikamucisyo cakwe cikutyocela kwa Mlungu jwa Yakobo,* mundu jwakukulupilila AMBUJE Mlungu jwakwe,

⁶ Mkupanganya jwa cilambo ca kwinani ni cilambo capasi, nyasa ni yosope yayili mwelemo akusasunga cilanga* cakwe ndaŵi syosope.

⁷ Akusiŵatendela yagoloka ŵandu ŵangali macili, akusiŵapa yakulya ŵandu ŵasala. AMBUJE akusiŵagopola ŵali mu ukayidi.

⁸ AMBUJE akusawugula meso ga ŵandu ŵangalola, AMBUJE akwakwesya ŵandu ŵa ulanda. AMBUJE akusiŵanonyela ŵandu ŵagoloka.

⁹ AMBUJE akwasunga acalendo, akusamcenjela jwamkongwe jwa masije ni mwanace jwa masije. Nambo akusagajonanga matala ga ŵandu ŵangalumbana.

¹⁰ AMBUJE taciŵa mwenye mpaka yaka yosope. Mlungu jwenu, jemanja ŵandu ŵa ku Siyoni,* tacilamulila kwa yaka yosope. Mwalumbe AMBUJE!