Masalimo 144 - Chiyawo Bible

Mwenye akumtogolela Mlungu ligongo lyakupunda pa ngondo

Salimo ja Daudi.

¹ Acimbicikwe AMBUJE,* lwala lwangu lwakunjenjela, ŵalakwe ŵakwiganya makono gangu ni yala yangu kuputa ngondo.

² Ali lwala lwangu, ni lipupa lyakungulupusya, ali lipende lyakunjenjela, ni kwakutilila kwangu; akuŵika mitundu ja ŵandu mu ulamusi wangu.

³ Ana mundu nduni kuti ŵakumbucileje ŵalakwe AMBUJE? Mwanace jwa mundu nduni kuti amganisyeje?

⁴ Mundu ali mpela lipuje, masiku gakwe gali mpela ciwilili cangatamilisya.

⁵ Apapulanye liwunde ni kutulucila pasi, ŵalakwe AMBUJE. Akwaye matumbi kuti gatuce lyosi.

⁶ Ajimesye njasi ni kwapwilinganya, amagongo ŵawo. Aponye mipamba jawo, ni ŵatoposye.

⁷ Atambasukule mkono wawo kutyocela kwinani; ambokasye ni kungulupusya ku mesi gamajinji, awombole m'makono mwa acalendo,

⁸ ŵele ŵakusaŵeceta ya unami, ni akusalumbila ya unami.

⁹ Tinjajimbila nyimbo ja sambano, Ŵalakwe Mlungu. Tinjajimbila cida cakwimbila ca ngonji likumi.

¹⁰ Ayimwene akupunda pa ngondo, ligongo lya ŵalakwe, ŵakumpokasya Daudi jwakutumicila jwawo.

¹¹ Ambokasye kwa amagongo ŵangalwe, angulupusye m'makono mwa acalendo, ŵakusaŵeceta ya unami ni kulumbila* ya unami.

¹² Ŵanace ŵetu ŵa acalume mu ucanda wawo, aŵe ŵamacili mpela yitela, ŵanace ŵetu ŵa acakongwe aŵe ŵakusalala mpela njalamila syakusalalisya nyumba ja mwenye.

¹³ Ngokwe syetu siŵe syasigumbale, sisunje yakulya ya mitundu josope. Ngondolo syetu siŵelece ŵanace ŵajinji ku lulila kwetu.

¹⁴ Ng'ombe syetu sikole maŵele sikapolosya kapena kulepela kuŵeleka. M'misewu jetu mukapikanika kulila ligongo lya yisawusyo.

¹⁵ Ŵana upile ŵandu ŵakusapocela upile wamti myiyi. Ŵana upile ŵandu ŵele Mlungu jwawo ali AMBUJE.