Masalimo 143 - Chiyawo Bible

Lipopelo lyakuŵenda cikamucisyo

Salimo ja Daudi.

¹ Apikane lipopelo lyangu, ŵalakwe AMBUJE.* Atejele lipikanilo kuti akupikane kucondelela kwangu. Anjanje ligongo lyakukulupicika kwawo ni kugoloka kwawo.

² Akasanjimba magambo une jwakutumicila jwawo, pakuŵa pangali mundu jwacijumi jwali jwagoloka pameso pa ŵalakwe.

³ M'magongo jwangu anguyisye, awuwuluwusisye umi ŵangu mluwundu, ni ŵandamice mcipi mpela ŵandu ŵaŵawile kala.

⁴ Ni ligongo lyakwe mtima ŵangu ulembwice mkati mwangu, mu mtima mwangu mukutenda woga.

⁵ Ngugakumbucila masiku gakala, nguyiganicisya yosope yayitesile, nguyikumbucila yosope yayitesile ni magasa gawo.

⁶ Ngusatambasukula makono gangu kwa ŵalakwe, umi ŵangu ukwakolela njota jakwasosa ŵalakwe mpela cilambo cacijumu.

⁷ Ajanguye kunjanga, ŵalakwe AMBUJE! Njasile mtima mnope. Akasasisa ngope jawo ndakulandana mpela ŵandu ŵakwinjila mwilembe.

⁸ Akunde kuti kundaŵi mbikane ya cinonyelo cawo cangamala, ligongo ngwakulupilila ŵalakwe. Andosye litala lyakuti njende. Pakuŵa ngusapeleka umi wangu kwa ŵalakwe.

⁹ Ŵalakwe AMBUJE angulupusye kwa amagongo ŵangu; ngutilila kwa ŵalakwe kuti anjenjele.

¹⁰ Anjiganye kuyitenda yakusaka ŵalakwe, pakuŵa ŵalakwe ali Mlungu jwangu. Msimu wawo wambone ulongolele une mwitala lyagoloka.

¹¹ Awusunje umi ŵangu AMBUJE kuti lina lyawo licimbicikwe. Andyosye une myisawusyo ligongo lyagoloka kwawo.

¹² Ŵawulaje amagongo ŵangu ligongo lya cinonyelo cawo cangamala pa une. Ŵawulaje wosope ŵakusawusya une, pakuŵa une ndili jwakutumicila jwawo.