Masalimo 142 - Chiyawo Bible

Lipopelo lyakuŵenda cikamucisyo

Ndakatulo ja Daudi. Ŵajisasile mpela lipopelo, pandaŵi jiŵaliji mu mbanga.

¹ Ngwalilila AMBUJE,* ngupopela kwa ŵalakwe AMBUJE ni maloŵe gangu.

² Ngupeleka yidandawulo yangu kwa ŵalakwe, ngwasalila yisawusyo yangu pameso pawo.

³ Pawukulembuka umi wangu, akusamanyilila Ŵalakwe yakuti niyitende. Amagongo andejele ngonji mwitala mungusajenda.

⁴ Ngulola ku mkono wamlyo ndolecesye kuti pangali jwalijose jwakusamalila ya une. Kwangali kwakutilila une, pangali mundu jwakusamala.

⁵ Ngwalilila ŵalakwe AMBUJE, kuti, Ŵalakwe ali kwakutilila kwangu. Ŵalakwe ali yosope yinguyisaka mu umi awuno.

⁶ Akupikane kulila kwangu; pakuŵa njasile mtima. Angulupusye kwa ŵandu ŵakusawusya, ligongo akwete macili gakumbunda une.

⁷ Angoposye une mu ukayidi, kuti nalitogolele lina lyawo, ŵandu ŵagoloka tacisyungulila, ligongo lyakuti ŵalakwe andendele yambone yejinji.