Masalimo 141 - Chiyawo Bible

Lipopelo lya ligulo

Salimo ja Daudi.

¹ Ngwaŵilanga ŵalakwe AMBUJE,* ajanguye kukungamucisya! Atejele lipikanilo kuti apikane liloŵe lyangu pingupopela kwa ŵalakwe.

² Lipopelo lyangu likwele mpela ubani* pameso pa ŵalakwe, ni kukwesya kwa makono gangu kuŵe mpela mbopesi ja ligulo.

³ Aŵice mlonda pakamwa pangu, ŵalakwe AMBUJE. Alondele pa mlango pa ngomo syangu.

⁴ Akakunda kuti mtima wangu usose yangalumbana, ngalipeleka ku ŵandu ŵakutenda yangalumbana, Ngajigala mbali pa yindimba yawo.

⁵ Amkunde mundu jwagoloka kumbuta kapena kunjamuka mwa mtendele, nambo ngapocela ucimbicimbi kwa ŵandu ŵangalumbana. Pakuŵa ngusapopela mwakusisyana ni yitendo yawo yangalumbana.

⁶ Ŵandu ŵakusakala pitacapeleka kwa ŵakulamula, pelepo ŵandu ŵangalumbanawo tacijiticisya kuti maloŵe ga AMBUJE gali gakuwona.

⁷ Mpela sasu sikusaŵaluka pakusala ni pakusikatanya, nombe nago mawupa gawo tigaciŵaluka myoyo ku malembe.

⁸ Nambo meso gangu gakulolecesya kwa ŵalakwe, AMBUJE Mlungu jwangu, ngusatilila kwa ŵalakwe kuti angulupusye, akandeka jika pangali jwakunjenjela.

⁹ Angulupusye ku ngonji syandejele, ni ku ngonji sya ŵandu ŵa yitendo yangalumbana.

¹⁰ Ŵandu ŵakusakala atanjile mu m'malwawu gawo, nambo une ngulupuce.