Masalimo 14 - Chiyawo Bible

Ungalumbana wa ŵandu

Kwa jwakwimbisya nyimbo. Salimo ja Daudi.

¹ Jwakuloŵela akusati mu mtima mwakwe, “Kwangali Mlungu.” Akusatenda yangalumbana ni yakunyalaya, pangali ni jumo jose jwakutenda yambone.

² AMBUJE* kwinaniko akwinamila pasi kwalola ŵandu, kuti alole ni mkaŵa pana jumo jwalunda ni kumlambila jwalakwejo.

³ Nambo ŵandu wosope ali ŵasokonecele, ŵandu wosope ali ŵakusakala. Pangali jumo jose jwakusatenda yambone, pangali atamose jumo jose.

⁴ AMBUJE akuwusya kuti, “Ana ŵandu ŵakutenda yangalumbana ali ŵangali lunda camti myiyi? Ana wosope ŵakutenda yangalumbanaŵa ali ŵangamanyilila? Jemanjajo akuŵa cijumi pakwajiŵila ŵandu ŵangu, nipo jemanjajo ŵangapopela kwa une.”

⁵ Nambo tiwucakola woga, pakuŵa Mlungu ali nawo pampepe ŵandu ŵakwe ŵakumpikanila jwalakwejo.

⁶ Ŵandu ŵakusakala akusalinga kusokonesya yakusasosa ŵandu ŵakulaga, nambo ŵakulagawo akusatilila kwa AMBUJE.

⁷ Ngupopela kuti cikulupusyo celeco ticiciyika ku Isalaeli kutyocela ku Siyoni.* AMBUJE pitacawucisya ukoto ŵandu ŵakwe, Yakobo* taciŵa ŵakondwa nipo Isalaeli yindu tiyicimjendela cenene.