Masalimo 139 - Chiyawo Bible

Mlungu akusamanyilila ni kuyisamala yosope

Kwa jwakwimbisya nyimbo. Salimo ja Daudi.

¹ AMBUJE,* ŵalakwe alolite mkati mwa mtima wangu; ni akuyimanyilila yosope ya une.

² Ŵalakwe akumanyilila pingutama pasi ni pingwimuka; akusasimanyilila nganisyo syangu ali kwanawula.

³ Akundolecesya pingwenda ni soni pingugona; akugamanyilila matala gangu gosope.

⁴ Maloŵe gangu mkanigayice pakamwa pangu, alole, ŵalakwe AMBUJE akugamanyilila gosope.

⁵ Ŵalakwe asyungulile une kunyuma ni kusogolo, ni akusajika mkono wawo.

⁶ Lunda lwawo lwakumanyilila une luli lwakusimonjeka; soni ngingupakombola kupikanicisya.

⁷ Tinjawule kwapi, pa kusaka kuwugwala msimu wawo, soni pakusaka kujitila ngope jawo?

⁸ Naga ngukwela kwinani, ŵalakwe ali kukoko; naga ngugona mcilambo ca ŵandu ŵawe alole, ŵalakwe ali kukoko.

⁹ Naga ngugulucila kulikopocela lyuŵa kapena kuja kwika kungapilo lyuŵa, kumbesi kwa nyasa,

¹⁰ atamose kweleko soni tacilongolela une, ni mkono wawo wamlyo tacinjenjela.

¹¹ Naga njile kuti, “Cipi cimbunicile, ni lilanguka lyalisyungulile liŵe cilo,”

¹² atamose cipico kwa ŵalakwe ngaŵa cipi kose, kwa ŵalakwe cilo cikuŵala mpela musi, ni cipi cili mpela lilanguka.

¹³ Pakuŵa ŵalakwe ni ŵapanganyisye ya mkati mwangu, ŵangumbile mcitumbo mwa mama ŵangu.

¹⁴ Ngwalumba ŵalakwe pakuŵa ŵangumbile mwakogoya ni mwakusimonjeka, masengo gawo gosope gali gakusimonjeka, ŵalakwe akumanyilila une cenene.

¹⁵ Mawupa gangu nganigasisika kwa ŵalakwe pinaliji mkupanganyikwa mwakusisika; pinagumbidwaga mwakusisika mcitumbo mwa mama ŵangu.

¹⁶ Meso gawo gambweni mkinimbagwe. Masikuga umi wangu ŵagalembile m'buku mwawo cilepe, mkinagatande kugaŵalanga.

¹⁷ Ŵalakwe Mlungu nganisyo syawo sili syakusimonjeka kwa une soni syangaŵalanjika.

¹⁸ Ngasiŵalanje, sikatupile kuwupunda msanga, pingwimuka ngusaŵa pampepe ni ŵalakwe.

¹⁹ Yinganonyele kuti ŵalakwe Mlungu ŵajonanje ŵandu ŵangalumbana! Nganonyele kuti ŵandu ŵakuwulaga acimjawo atyoce.

²⁰ Akusaŵeceta yangalumbana ya ŵalakwe, acajimucililaga ŵalakwe ni mtima wakusakala.

²¹ Ana nganguŵengana nawo ŵandu ŵakwaŵenga ŵalakwe AMBUJE? Ana ngati akunyalaya ŵandu ŵakwajimucila ŵalakwe?

²² Nguŵengana nawo ni uŵengani usyene. Ngusinatenda amagongo ŵangu.

²³ Andolecesye, ŵalakwe Mlungu, kuti awumanyilile mtima wangu. Alinje une, kuti amanyilile nganisyo syangu.

²⁴ Andolecesye naga ngukuya matala gangalumbana galigose, ni alongolele mwitala lyawo lyangamala.