Masalimo 137 - Chiyawo Bible

Yidandawulo ya Aisalaeli mcilambo ca cilendo

¹ Mungulugulu mwa sulo sya ku Babiloni* twatemi pasi tuli mkulila; tuli mkukumbucila Siyoni*

² Twakolece yida yetu yakwimbila ya ngonji mu yitela yiyaŵandikene ni uwe.

³ Kweleko ŵandu ŵaŵatukamwile ukapolo ŵatulamwile kuti tujimbe nyimbo syetu. Ŵatulamwile kuti twasangalasye, ŵatite, “Mtujimbile nyimbo jimo ja Siyoni.”

⁴ Sambano uwe twatite, “Tutujimbe uli nyimbo ja AMBUJE* mcilambo ca cilendo?”

⁵ Naga ngumliŵalila m'mwe Yelusalemu, mkono wangu wamlyo unyolole.

⁶ Lulumi lwangu lunyambatile mkamwa mwangu, naga ngumliŵalila m'mwe Yelusalemu, ni kumwona kuti mli ŵakusangalasya ŵangu.

⁷ Akumbucile, ŵalakwe AMBUJE, yiŵatendele Aedomu pa lisiku lila lyakonasika kwa Yelusalemu piŵatite pala kuti, “Mumgwicisye pasi, mumgwicisye pasi, mpaka pa yilimbilimbi yakwe!”

⁸ Msinda wa Babiloni m'mwe ŵakwenela konasika, taciŵa jwana upile mundu jutacimwucisya yimtutendele uwejiyi.

⁹ Taciŵa mundu jwana upile jwele jutacijigala makandi genu ni kugaputisya pa lwala.