Masalimo 135 - Chiyawo Bible

Nyimbo ja malumbo

Salimo ja Daudi.

¹ Mwalumbe AMBUJE!* Mlilumbe lina lyawo AMBUJE, mwalumbe jemanja ŵakutumicila ŵakwe AMBUJE.

² Jemanja ŵimkusajimilila m'nyumba ja AMBUJE, mu nganya sya Nyumba ja AMBUJE ŵetu.

³ Mwalumbe AMBUJE, pakuŵa ali ŵambone; mwajimbile nyimbo syakwalumba, pakuŵa ali ŵacanasa.

⁴ Pakuŵa AMBUJE alisagulile Yakobo* kuti aŵe jwakwe, Isalaeli kuti aŵe cipanje cakwe.

⁵ Pakuŵa ngumanyilila kuti AMBUJE ali ŵakulungwa, ni kuti AMBUJE ŵetu, ali ŵamacili kujipunda milungu jine josope.

⁶ Cilicose cele AMBUJE akusaka kucitenda, akusacitenda ku cilambo cakwinani ni pa cilambo capasi, m'nyasa ni mosope mwakusokoka.

⁷ Jwalakwe ni jwakusakoposya mawunde kumbesi kwa cilambo capasi, gele gagakutendesya njasi sya ula, soni ŵakupujisya mbungo kutyocela mu ngokwe syakwe.

⁸ Jwalakwe ŵawuleje ŵanace ŵandanda kupagwa ŵacalume ŵa ku Iguputo, ŵanace ŵa ŵandu ni ŵayilangwa yakwe,

⁹ ŵele ŵamlosisye Mwenye jwa ku Iguputo ni ŵakutumicila ŵakwe wosope, yimanyisyo yamacili ni yakusimonjeka mcilambo ca Iguputo.

¹⁰ Ni ŵele ŵasijonasile ngosyo syejinji sya ŵandu, ni kwawulaga ayimwene ŵamacili ŵala.

¹¹ Sihoni, mwenye jwa Aamoli, ni Ogi, mwenye jwa ku Bashani, pampepe ni ayimwene wosope ŵa ku Kenani.

¹² Ŵapele cilambo ŵandu ŵakwe; Aisilayeli, ŵandu ŵa Mlungu.

¹³ Lina lyawo AMBUJE, lili lya yaka yosope; kupikanika kwawo kuli kwa yaka yosope.

¹⁴ Pakuŵa AMBUJE tacacenjela ŵandu ŵakwe tacatendela canasa ŵakutumicila ŵakwe.

¹⁵ Tumilungu twakupanganya twa ngosyo sine sya ŵandu tuli twa silifa* ni golidi,* yiŵayipanganyisye ni makono ga ŵandu

¹⁶ Pakamwa yikwete nambo ngayikupaŵeceta kose, meso yikwete, nambo ngayikulola kose,

¹⁷ mapikanilo yikwete, nambo ngayikupikana kose, ngayikupakombola kose kupumula.

¹⁸ Ŵandu ŵakusapanganya tumilunguto alandane nato, ni ŵandu wosope ŵakusayikulupilila.

¹⁹ Jemanja ŵa liŵasa lya Isalaeli, mwalumbe AMBUJE. Mwalumbe ŵalakwewo, jemanja ŵa liŵasa lya Aloni,* mwalumbe AMBUJE.

²⁰ Jemanja ŵa liŵasa lya Lefi, mwalumbe AMBUJE. Jemanja ŵimkwajogopa AMBUJE, mwacimbicisye.

²¹ Mwalumbe AMBUJE ku Siyoni,* ŵele ŵakutama ku Yelusalemu. Mwalumbe AMBUJE!