Masalimo 132 - Chiyawo Bible

Kujilumba Nyumba ja AMBUJE

Nyimbo jakwimba pakukwela kuja kwitumbi.

¹ Ŵalakwe AMBUJE,* amkumbucile Daudi* mu yisawusyo yakwe yosope yiŵapimilile.

² Ŵalumbilile kwa ŵalakwe AMBUJE, soni ŵaŵisile cilanga,* pameso pa ŵalakwe Mlungu, Jwamacili jwa Yakobo* kuti,

³ “Nginjinjila m'nyumba mwangu kapena pa cindanda cangu,

⁴ ngingunda kuti ndame mlugono, kapena meso gangu kuti gagwesele,

⁵ mpaka nigapate malo gawo AMBUJE, malo gakutama Mlungu Jwamaciligosope jwa Yakobo.”

⁶ Twapikene ya Libokosi lya Cilanga ku Efulati, twalisimene m'migunda ja ku Yaala.

⁷ “Kwende tujawule kumalo kwakutama AMBUJE, kwende tukamtindiŵalile ku citengu cakwe ca ucimwene.”

⁸ Ajimuce, AMBUJE ni kwawula kumalo gawo gakutama. Ŵalakwe ni Libokosi lya Cilanga lyalikulosya macili gawo.

⁹ Ŵakutaga mbopesi ŵawo awale canasa mpela mwakuwalila cakuwala, ni ŵandu ŵawo ŵaswela mtima agumile mwakusangalala.

¹⁰ Ligongo lya cilanga ciŵaŵisile kwa Daudi jwakutumicila jwawo, akamkana mwenye juŵamsagwile.

¹¹ AMBUJE ŵamlumbilile Daudi mwakulimba, soni ngasatindanya cilanga, ŵatite, “Tinjimtamika pa citengu ca ucimwene jumo jwa ŵanace ŵenu ŵacalume.

¹² Naga ŵanace ŵenu ŵacalume tacisunga cilanga cangu ni malamusi gitinjajiganya, ŵanace ŵawo nombe nawo tacitama pa citengu cenu ca ucimwene kwa yaka yosope.”

¹³ AMBUJE asagwile Siyoni;* akusaka kuti gaŵe malo gakwe gakutama.

¹⁴ Akuti, “Gelega gali malo gangu gakupumulila kwa yaka yosope. Tinjitama kwekuno pakuŵa nakusacilile.

¹⁵ Tinjipeleka upile ku msinda wa Siyoni pakuwupa yakusoŵa yakwe. Ŵandu ŵakwe ŵakulaga tinjapa yakulya yakwanila.

¹⁶ Ŵakutaga mbopesi ŵakwe tinjatakusya ni ukulupusyo, ni ŵandu ŵakwe ŵaswela mtima tacigumila mwakondwa.

¹⁷ Kweleko tinjiŵika jumo jwa yisukulu ya Daudi kuŵa mwenye jwamkulungwa; Namlinganyicisye cilepe nyali ja mwenye junamsagwile.

¹⁸ Tinjatesya soni amagongo ŵakwe, nambo ucimwene wakwe tiwucijendelecela kwenda cenene.”