Masalimo 130 - Chiyawo Bible

Lipopelo lyakuŵenda cikamucisyo

Nyimbo jakwimba pakukwela kuja kwitumbi.

¹ Ngwalilila ŵalakwe AMBUJE,* ndili mwisimbo lyakusokoka lya yisawusyo.

² AMBUJE, apikane liloŵe lyangu! Atejele lipikanilo kuti apikane liloŵe lya kuŵenda kwangu.

³ Yikaŵe kuti ulemwa* uliwose wa ŵandu akuwulemba AMBUJE, Ana ŵani ŵakakutisile kulamula kwa Mlungu?

⁴ Nambo ŵalakwe akusakululucila, ni ligongo lyakwe tukusitwacimbicisyaga.

⁵ Ngwembeceya cikamucisyo ca AMBUJE, ngwembeceya ni mtima wangu wosope soni ngugakulupilila maloŵe gawo.

⁶ Umi ŵangu ukwajembeceya AMBUJE, kwapunda acilonda ŵakusalindilila kuca, Elo, kwapunda acilonda ŵakusalindilila kuca.

⁷ M'mwe Isalaeli, mwakulupilile AMBUJE, pakuŵa cinonyelo ca AMBUJE cili cangamala, mwa jwalakwe mwana cikulupusyo.

⁸ Tacawombola ŵa ŵakwe Aisalaeli kutyocela ku ulemwa wawo.