Masalimo 126 - Chiyawo Bible

Lipopelo lyakuŵenda cikamucisyo

Nyimbo jakwimba pakukwela kuja kwitumbi.

¹ Katema kele AMBUJE* ŵawusisye acikapolo ku Siyoni,* twaliji mpela ŵandu ŵakusagamila.

² Papopo twasecelele mnope twalulutile ni lukondwa. Ŵandu ŵa mitundu jine* ŵatite kuti, “AMBUJE ŵatendele yayikulungwa.”

³ Kusyene AMBUJE atutendele yayikulungwa, uwe tuli ŵakusengwa.

⁴ Atuwucisye lumbili lwetu, ŵalakwe AMBUJE, mpela mwakuwucisya mesi mu sulo syasijumwile.

⁵ Ŵandu ŵele ŵakupanda acililaga, tacigowola mwakusengwa.

⁶ Mundu jwakwenda ali mkulila ali ajigele mbeju syakupanda taciwujilila kumusi ali jwakondwa; ali atwicile yakugowola yakwe.