Masalimo 125 - Chiyawo Bible

Mlungu akwacenjela ŵandu ŵakwe

Nyimbo jakwimba pakukwela kuja kwitumbi.

¹ Ŵandu ŵele ŵakumkulupilila AMBUJE* ali mpela Litumbi lya Siyoni,* lyele likakukomboleka kutenganyika nambo lya citamile kwa yaka yosope.

² Mpela matumbi gosope gasyungulile Yelusalemu myoyo soni AMBUJE ŵasyungulile ŵandu ŵakwe kutandilila sambano mpaka yaka yangali pambesi.

³ Ayimwene ŵakusakala ngasalamulila ndaŵi syosope cilambo ciŵacipelece kwa ŵandu ŵagoloka, kogopela kuti ŵandu ŵagolokawo atakutenda yangalumbana.

⁴ AMBUJE, ŵatendele yambone ŵandu ŵele ŵali ŵambone ni ŵagoloka mtima.

⁵ Nambo ŵandu ŵakukuya matala gangalumbana; AMBUJE tacatopolela kwali ŵandu ŵakutenda yangalumbana. Mtendele uŵe ni Isalaeli.