Masalimo 124 - Chiyawo Bible

Mlungu mkulupusyo jwa ŵandu ŵakwe

Nyimbo jakwimba pakukwela kuja kwitumbi. Ja Daudi.

¹ Yingaŵe kuti AMBUJE* nganaŵa kumbali jetu, asale sambano Isalaeli.

² Yingaŵe kuti AMBUJE nganaŵa kumbali jetu, piŵatujimucilile ŵandu,

³ angatumisile uwe ŵacijumi, ndaŵi jiŵatupilile mtima kala.

⁴ Soni cikumba cingatupyajisile; ni kuŵilima kwa mesi kungatukokosile.

⁵ Mesi gamaciligo gakatutiŵisye.

⁶ Acimbicikwe AMBUJE ŵele ŵamkanatupeleka kwa ŵanduwo kuti atujonanje.

⁷ Tukolokwece mpela cijuni cakutanjila mu ngonji, sya ŵakusakula; ngonji syakutwice uwe tukulupwice.

⁸ Cikamucisyo cetu cikutyocela kwa AMBUJE, uŵapanganyisye kwinani ni cilambo capasi.