Masalimo 119 - Chiyawo Bible

Malamusi ga AMBUJE

¹ Ŵana upile ŵele ŵimkanakola ligongo lyakwajamucila; ŵele ŵakwenda ali mkukuya Malamusi ga AMBUJE.*

² Ŵana upile ŵele ŵakugasunga Malamusi ga AMBUJE. Ŵele ŵakumsosa AMBUJE ni mtima wawo wosope.

³ Ŵele ŵingakutenda yakulemwa; nambo akwenda m'matala ga AMBUJE.

⁴ Ŵalakwe AMBUJE apelece malamusi gawo, alamwile kuti agasunje mwakulupicika.

⁵ Nganonyele kuti matala gangu gaŵe gakulupicika, pakugasunga malamusi gawo.

⁶ Pelepo ŵandu ngasandesya soni, naga ngukuya malamusi gawo gosope.

⁷ Tinjatogolela ŵalakwe ni mtima wagoloka, pitinalijiganye majiganyo gawo gagoloka.

⁸ Tinjigagosa malamusi gawo, akandeka jika.

Kugapikanila Malamusi ga AMBUJE

⁹ Ana mcanda mpaka apakombole uli kujisunga ndamo jakwe kuti jiŵe jagoloka? Pakugasamala ni kugakuya malamusi gawo.

¹⁰ Ngwasosa ni mtima ŵangu wosope, akakunda kuti nigalece kwiticisya malamusi gawo.

¹¹ Nagasunjile maloŵe gawo mu mtima mwangu, kuti ngasinalemwecesya.

¹² Ngwalumba ŵalakwe AMBUJE, anjiganye malamusi gawo.

¹³ Ngugasala mwakuwilisya limolimo mwakwesya maloŵe, malamusi gosope ga pakamwa pawo.

¹⁴ Kwenda mwitala lya malamusi gawo kukunonyelesya, kulekangana ni kola cipanje cejinji.

¹⁵ Tinagaganicisye malamusi gawo, ni kuŵika mtima ŵangu wosope pa majiganyo gawo.

¹⁶ Tinjisangalala ni malamusi gawo, ni maloŵe gawo ngasinagaliŵalila.

Lukondwa kwa ŵakugasunga Malamusi ga AMBUJE

¹⁷ Asalalile mtima une jwakutumicila jwawo, kuti ngole umi ni kugasunga maloŵe gawo.

¹⁸ Awugule meso gangu, kuti ndole yindu yakusimonjeka ya malamusi gawo.

¹⁹ Une ngutama pa cilambo capasi kwa ndaŵi japanandi; akasisila malamusi gawo.

²⁰ Umi wangu ulembwice ligongo lyakusosasosa majiganyo gawo ndaŵi syosope.

²¹ Ŵalakwe akusiŵajamuka ŵakulikwesya; ŵalwesece ŵele ŵandu ŵakugaleka malamusi gawo.

²² Atyosye kwa une kusambula ni mwano wakundendela ŵandu, ligongo une nagasunjile malamusi gawo.

²³ Atamose ayimwene andendele malindi gakusakala; une jwakutumicila jwawo tinjigaganicisya malamusi gawo.

²⁴ Malamusi gawo gakusangalasya; soni gakusanjiganya.

Kusacilila kugapikanila Malamusi ga AMBUJE

²⁵ Umi wangu ukuwuluwumba mluwundu, ambucisye umi ŵangu mpela mwa maloŵe ga cilanga* cawo cila.

²⁶ Ndaŵi jinasalile ya matala gangu, ŵalakwe ŵanjanjile. Anjiganye malamusi gawo.

²⁷ Angamucisye kuti nagapikanicisye malamusi gawo, tinagaganicisye masengo gawo gakusimonjeka.

²⁸ Umi wangu ulembwice ligongo lya canasa, alimbisye mpela muŵatendele cilanga.

²⁹ Asunje une kuti ngajenda m'matala gakusakala, mwa umbone wawo anjiganye malamusi gawo.

³⁰ Une sagwile litala lyakuti mbe jwakulupicika, mbisile majiganyo gawo mu mtima mwangu.

³¹ Ngugasunga malamusi gawo, ŵalakwe AMBUJE, akakunda kuti ŵandu andesye soni.

³² Tinguye litala lya malamusi gawo, pitanjonjecesye lunda lwakugapikanicisya.

Lipopelo lyakuŵenda lunda

³³ Anjiganye une, ŵalakwe AMBUJE, litala lyakugasunjila malamusi gawo, ni tinjigasunga mpaka kumbesi.

³⁴ Ambe lunda, lwakuti nagasunje malamusi gawo, ni kugakuya ni mtima ŵangu wosope.

³⁵ Alongolele kuti nigapikane malamusi gawo; ligongo ngusisangalala nago.

³⁶ Awujiganye mtima wangu kuti uganonyele malamusi gawo, ngaŵa cipanje.

³⁷ Agalekasye meso gangu kuti gakalola yindu yangali mate, ambe umi mpela mwa maloŵe ga cilanga cawo.

³⁸ Acisunje cilanga cawo kwa une, jwakutumicila jwawo, cele cakusaŵika ni ŵandu ŵakwajogopa ŵalakwe.

³⁹ Atyosye cipongwe cingucijogopa, ligongo kulamula kwawo kuli kwagoloka.

⁴⁰ Alole, ngusaka kugakuya malamusi gawo. Ambe umi ligongo ŵalakwe ali ŵagoloka.

Kukulupilila Malamusi ga AMBUJE

⁴¹ Anonyele une ni cinonyelo cawo cangamala, ŵalakwe AMBUJE, angulupusye mpela mwa cilanga cawo.

⁴² Pelepo tinjikola cakwajanga ŵandu ŵele ŵakunjalusya, pakuŵa ngusakulupilila maloŵe ga ŵalakwe.

⁴³ Akasandekasya une kuŵeceta maloŵe gawo gakuwona, pakuŵa ngugakulupilila malamusi gawo.

⁴⁴ Tinjijendelecela kugasunga malamusi gawo kwa yaka yosope.

⁴⁵ Tinjijenda mwa mtendele, ligongo lyakuti ngugasunga malamusi gawo.

⁴⁶ Tinjiŵeceta ya malamusi gawo pameso pa ayimwene, ŵandu ngasandesya soni.

⁴⁷ Pakuŵa une ngusisangalala ni malamusi gawo ligongo ngusaganonyela.

⁴⁸ Ngugacimbicisya malamusi gawo gele ginguganonyela, ni ngusaŵaga ndili mkugaganicisya malamusigo.

Kukulupilila Malamusi ga AMBUJE

⁴⁹ Akumbucile cilanga cawo cila kwa une jwakutumicila jwawo, cimbele une cembeceyo.

⁵⁰ Atamose myisawusyo yangu, cele cikusasangalasya; cili cakuti yilanga yawo yikusamba umi.

⁵¹ Ŵandu ŵangasamala ya AMBUJE akusanyosya une, nambo une ngasindekangana nago malamusi gawo.

⁵² Ngugakumbucila malamusi gawo gakala; ŵalakwe AMBUJE, ni gakundulasya mtima wangu.

⁵³ Ngusapya mtima mnope, ligongo lya ŵandu ŵakusakala ŵakugakana malamusi gawo.

⁵⁴ Malamusi gawo gaŵele nyimbo syangu; ngusajimba kulikose kungwenda.

⁵⁵ Ngusinakumbucila cilo, ŵalakwe AMBUJE, ngusasunga malamusi gawo.

⁵⁶ Upile welewu ungwilile une, ligongo lyakugasunga malamusi gawo.

Kulipeleka ku Malamusi ga AMBUJE

⁵⁷ AMBUJE, ŵalakwe ali yosope yinguyisaka, nguŵika cilanga kusunga maloŵe gawo.

⁵⁸ Ngwaŵenda ni mtima ŵangu wosope, andendele canasa mpela mwa maloŵe ga cilanga cawo cila.

⁵⁹ Pingusaganicisya ya matala gawo, ngusagalawuka kuti nigakuye malamusi gawo.

⁶⁰ Ngusajanguya, soni ngisingokoŵa kugakuya malamusi gawo.

⁶¹ Atamose ŵandu ŵangalumbana andejele ngonji, ngisindiŵalila malamusi gawo.

⁶² Ngusajimuka pasikati pa cilo kuti nalumbe ŵalakwe, ligongo lya malamusi gawo gagoloka.

⁶³ Une ndili mbusanga jwa ŵandu ŵa kwajogopa ŵalakwe; ni ŵandu ŵakugasunga malamusi gawo.

⁶⁴ AMBUJE, cilambo capasi cigumbele ni cinonyelo cawo cangamala, anjiganye une malamusi gawo.

Umbone ŵa Malamusi ga AMBUJE

⁶⁵ Nganajasa cilanga cawo, ŵalakwe AMBUJE mpela mwa maloŵe gawo, pakusalalila mtima une jwakutumicila jwawo.

⁶⁶ Ambe une lunda, ni kumanyilila ligongo ngusagakulupilila malamusi gawo.

⁶⁷ Nalesile kugakuya malamusi gawo nambo pinapatile yipwetesi; sambano ngugasunga maloŵe gawo gosope.

⁶⁸ Ŵalakwe ali ŵambone, akusatenda yambone, anjiganye malamusi gawo.

⁶⁹ Ŵandu ŵangakusamalila ya AMBUJE akusambecetela ya unami, nambo une ngugasunga malamusi gawo ni mtima wangu wosope.

⁷⁰ Ŵandu ŵeleŵa ngakugapikanicisya malamusi gawo, nambo une ngusangalala ni malamusi gawo.

⁷¹ Natesile cenene kuyipata yipwetesi, kuti nilijiganye malamusi gawo.

⁷² Malamusi giŵambele une gali gambone; kusipunda mbiya syejinji sya golidi ni silifa.

Kulungamika kwa Malamusi ga AMBUJE

⁷³ Makono gawo gangumbile ni kumbanganya une; ambe lunda lwakupikanicisya, kuti nilijiganye malamusi gawo.

⁷⁴ Ŵandu ŵakwacimbicisya ŵalakwe tacimbona ni tacisangalala, pakuŵa kuti nagakulupilile maloŵe gawo.

⁷⁵ Ŵalakwe AMBUJE, ngumanyilila kuti, kulamula kwawo kuli kwagoloka, mbatile cilango ligongo ŵalakwe ali ŵakulupicika.

⁷⁶ Akunde kuti cinonyelo cawo cangamala, cindulasye une jwakutumicila jwawo mpela muŵaŵicile cilanga.

⁷⁷ Andendele canasa kuti mbe jwana umi; pakuŵa malamusi gawo gakusangalasya.

⁷⁸ Ŵandu ŵangakusamala ya AMBUJE ŵatesye soni, ligongo andemwecesye pakulambucisya.

⁷⁹ Ŵakunde ŵandu ŵakwajogopa ŵalakwe ayice kwa une; kuti alijiganye malamusi gawo.

⁸⁰ Nigakuye malamusi gawo umi wangu wosope kuti sikandenda soni.

Lipopelo lyakuŵenda cikamucisyo

⁸¹ Umi ŵangu upesile ni kulindilila cikulupusyo cawo, nambo nguŵika cikulupi m'maloŵe gawo.

⁸² Meso gangu gacejele pakulindilila cilanga cawo, nguwusya kuti, “Ana tacingamucisya cakaci?”

⁸³ Mbesile mpela msaku ŵa lipende wewucilile ni lyosi, nambo ngingugaliŵalila malamusi gawo.

⁸⁴ Ana une mbimilile mpaka cakaci? Ana ŵandu ŵele ŵakusawusya une tacapa cakaci cilango?

⁸⁵ Ŵandu ŵangasamala ya AMBUJE, ŵandu ŵingakukuya malamusi gawo asolele lisimbo.

⁸⁶ Malamusi gawo gosope gali gakulupicika; ŵanduwo akundagasya ni ya unami angamucisye.

⁸⁷ Ŵasigalile panandi kundyosya pa cilambo capasi, nambo une nganindeka kugakuya malamusi gawo.

⁸⁸ Awusunje umi ŵangu ligongo lya cinonyelo cawo cangamala, kuti nagasunje malamusi gawo.

Kukulupilila Malamusi ga AMBUJE

⁸⁹ Ŵalakwe AMBUJE, maloŵe gawo gali gacitamile kwinani kwa yaka yosope.

⁹⁰ Kulupicika kwawo kuli kwa yaka yosope. Ŵalakwe ŵacitamice cilambo capasi ni ngasicitenganyika.

⁹¹ Yindu yosope yili ciŵela mpaka lelo jino ligongo lya kulamula kwawo. Pakuŵa yindu yosope yikwatumicila.

⁹² Ligongo malamusi gawo ganonyele une, nganimbwa, atamose yakupweteka yayicilile.

⁹³ Ngasindiŵalila kose majiganyo gawo, pakuŵa ambele nago umi.

⁹⁴ Une ndili jwawo, angulupusye, pakuŵa nigasunjile malamusi gawo.

⁹⁵ Ŵandu ŵangalumbana ŵanjuŵilile kuti anjonanje, nambo une ngusaganicisya ya malamusi gawo.

⁹⁶ Manyilile kuti yambone yosope yana mbesi, nambo malamusi gawo gali gangali mbesi.

Kuganonyela Malamusi ga AMBUJE

⁹⁷ Nguganonyela malamusi gawo mnope, ngusaŵaga ndili mkuganicisya ya malamusi gawo lisiku lyosope.

⁹⁸ Malamusi gawo gakumba lunda kwapunda amagongo ŵangu; pakuŵa malamusi gawo gali ni une ndaŵi syosope.

⁹⁹ Ngamulile lunda lwakupikanicisya kwapunda aciŵalimu ŵangu wosope, ligongo lyakuti ngusaganicisya ya malamusi gawo.

¹⁰⁰ Ngwete lunda kwapunda ŵacekulupe, pakuŵa ngusasunga malamusi gawo.

¹⁰¹ Ngusasilekasya sajo syangu kuti sikajenda mwitala lili lyose lyangalumbana, kuti nigasunje maloŵe gawo.

¹⁰² Nganindekangana nago majiganyo gawo, pakuŵa ŵalakwe ŵanjiganyisye.

¹⁰³ Maloŵe gawo gakulyolyopela mnope pangugapasya. Gakulyolyopela kuwupunda uci mkamwa mwangu.

¹⁰⁴ Ligongo lya malamusi gawo ngupata lunda. Ni ligongo lyakwe ngusaŵengana ni yili yose yakusakala.

Malamusi ga AMBUJE gakusamulicila

¹⁰⁵ Maloŵe gawo gali nyali ja ku sajo syangu, gakusamulicila litala lyangu.

¹⁰⁶ Nalumbile, ni kusimicisya, kuti tinjigasunga majiganyo gawo gagoloka.

¹⁰⁷ Une ndasile kwakogoya, ambe une umi, ŵalakwe AMBUJE mpela mwa maloŵe ga cilanga cawo cila.

¹⁰⁸ Apocele mapopelo gangu gakutogolela, ŵalakwe AMBUJE; ni kunjiganya malamusi gawo.

¹⁰⁹ Umi wangu uli muyakogoya ndaŵi syosope, nambo nganindiŵalila malamusi gawo.

¹¹⁰ Ŵandu ŵangalumbana ŵandejele ngonji, nambo une nganisokonecela ni kutyoka mwitala lya malamusi gawo.

¹¹¹ Malamusi gawo gali cipanje cangu cangamala kwa yaka yosope. Pakuŵa gakuwusangalasya mtima ŵangu.

¹¹² Awujiganye mtima ŵangu kuti uganonyele malamusi gawo kwa yaka yosope.

Malamusi ga AMBUJE gakusakulupusya mundu

¹¹³ Nguŵengana nawo ŵandu ŵa unakunaku; nambo une nguganonyela malamusi gawo.

¹¹⁴ Ŵalakwe ali malo gakunjenjela ni gingusajuŵa une, nguŵika cikulupi cangu m'maloŵe gawo.

¹¹⁵ Mundyocele jemanja ŵandu ŵakutenda yangalumbana, kuti une nipakombole kugasunga malamusi ga Mlungu jwangu.

¹¹⁶ Anjenjele mpela mwa maloŵe ga cilanga cawo cila, kuti ngole umi, ni ŵandu akasandesya soni mcikulupi cangu.

¹¹⁷ Angamulisye kuti ngulupuce, kuti nigasunje malamusi gawo.

¹¹⁸ Ŵalakwe akwakana ŵandu ŵangagapikana malamusi gawo, kusyene, kukalamuka kwawo kwangali mate.

¹¹⁹ Ŵandu wosope ŵangalumbana ŵa pa cilambo capasi, akwajasa mpela yiswani kucitutu ni ligongo lyakwe nguganonyela malamusi gawo.

Kupikanila Malamusi ga AMBUJE

¹²⁰ Cilu cangu cikutetemela ligongo lya kwajogopa ŵalakwe, ngutenda woga ni kulamula kwawo.

¹²¹ Une nayitesile yayili yagoloka ni yambone. Akandeka m'makono mwa ŵandu ŵakusawusya.

¹²² Alumbile kuti tacindendela yambone; une jwakutumicila jwawo, akasakunda kuti ŵandu ŵangasamala ya AMBUJE asawusye une.

¹²³ Meso gangu gapesile ligongo lyakulindilila cikulupusyo cawo, ni ligongo lyakwembeceya kuti cilanga ca maloŵe gawo gagoloka gala gatendekwe.

¹²⁴ Andendele canasa ligongo lya cinonyelo cawo cangamala, ni anjiganye malamusi gawo.

¹²⁵ Une jwakutumicila jwawo ambe lunda lwakupikanicisya; kuti mbate kumanyilila malamusi gawo.

¹²⁶ Jiyice ndaŵi jakuti ŵalakwe AMBUJE atende kandu, pakuŵa ŵandu akasile malamusi gawo.

¹²⁷ Nguganonyela malamusi gawo kulekangana ni golidi, jwamjenje cenene.

¹²⁸ Malamusi gawo gakunjongolela kwenda kwangu kosope; nambo ngugaŵenga matala gosope ga cabe.

Kusacilila kupikana Malamusi ga AMBUJE

¹²⁹ Malamusi gawo gali gambone, ni ligongo lyakwe ngugasunga ni mtima wangu wosope.

¹³⁰ Kugopolela kwa maloŵe gawo kukusapeleka lilanguka; kukusapeleka lunda kwa ŵandu ŵangamanyilila.

¹³¹ Ngwasamukula pakamwa pangu ni kupumasika, ligongo ngusagasacilila malamusi gawo.

¹³² Angalawucile ni kundendela canasa mpela mwakwatendela ŵandu ŵakwanonyela ŵalakwe.

¹³³ Awulongolele wende ŵangu mpela mwa cilanga cawo cila, akakunda kuti ulemwa* uliwose undamulile.

¹³⁴ Angulupusye kwa ŵandu ŵakusawusya une, kuti nigakuye malamusi gawo.

¹³⁵ Andendele canasa une jwakutumicila jwawo, ni kunjiganya malamusi gawo.

¹³⁶ Meso gangu gakugwisya misosi mpela sulo, ligongo ŵandu ngakugasunga malamusi gawo.

Kugoloka kwa Malamusi ga AMBUJE

¹³⁷ Ŵalakwe AMBUJE ali ŵagoloka, ni kulamula kwawo kuli kwagoloka.

¹³⁸ Malamusi gatupele gali gagoloka ni gakulupicika.

¹³⁹ Ukali ŵangu ukukolela mpela moto mu mtima mwangu, ligongo kuti amagongo ŵangu ngakugaŵalanjila malamusi gawo.

¹⁴⁰ Cilanga cawo cili cakuwona, une jwakutumicila jwawo ngusacinonyela.

¹⁴¹ Une ndili jwamnondi ni jwakunyosyeka, nambo ngingusaliŵalila malamusi gawo.

¹⁴² Kugoloka kwawo kuli kwangamala ni malamusi gawo gali gakuwona.

¹⁴³ Yisawusyo yangwilile pampepe ni yipwetesi yakwe, nambo malamusi gawo gakusangalasya.

¹⁴⁴ Kwiganya kwawo kuli kwagoloka ambe lunda lwakupikanicisya kuti ngole umi.

Lipopelo lyakuŵenda cikulupusyo

¹⁴⁵ Ngulila kwa ŵalakwe ni mtima wangu wosope, anjanje, Ŵalakwe AMBUJE, soni tinigasunje malamusi gawo.

¹⁴⁶ Ngwalilila ŵalakwe, angulupusye, kuti nigasunje malamusi gawo.

¹⁴⁷ Ngusajimuka kumasikusiku kuti mbende cikamucisyo, cikulupi cangu cili m'malamusi.

¹⁴⁸ Ngusaŵa mesope cilo cosope njiganisyaga ya cilanga cawo.

¹⁴⁹ Apikane maloŵe gangu ligongo lya cinonyelo cawo cangamala. AMBUJE, andendele canasa ni kuwusunga umi ŵangu.

¹⁵⁰ Ŵandu ŵangalwe ŵakusawusya asigele panandi kwika; jemanjajo akutama kwakutalicila ni malamusi gawo ŵalakwe.

¹⁵¹ Nambo ŵalakwe AMBUJE ali ciŵandika; ni malamusi gawo gosope gali gakuwona.

¹⁵² Nagamanyilile malamusi gawo kutandilila kalakala; ŵagapelece kuti gatamilicice mpaka yaka yosope.

Kuŵenda cikulupusyo

¹⁵³ Ayilole yisawusyo yangu, ni kungulupusya, ligongo ngingugaliŵalila malamusi gawo.

¹⁵⁴ Anjenjele pa magambo gangu, ni kuwombola; ambe umi mpela mwa cilanga cawo cila.

¹⁵⁵ Cikulupusyo cili kwakutalicila kwa ŵandu ŵakusakala; pakuŵa ngakugasosa malamusi gawo.

¹⁵⁶ Canasa cawo cili cacikulungwa, ŵalakwe AMBUJE, ambe umi mpela mwa cilanga cawo.

¹⁵⁷ Ŵandu ŵakusawusya soni amagongo ŵangu apali ŵajinji, nambo ngangulekangana ni malamusi gawo.

¹⁵⁸ Yikusanyalaya kwalola ŵandu ŵangakulupicika, ligongo ngakugasunga malamusi gawo.

¹⁵⁹ Alole yinguti pakuganonyela malamusi gawo, awusunje umi ŵangu mpela mwa cinonyelo cawo cangamala.

¹⁶⁰ Maloŵe gawo gali gakuwonawonape, ni majiganyo gawo gagoloka gali gangamala.

Kulipeleka ku Malamusi ga AMBUJE

¹⁶¹ Ayimwene akundagasya pangali kose ligongo, nambo umi ŵangu ukusajogopa maloŵe gawo.

¹⁶² Ngusangalala nago maloŵe gawo; mpela mundu jwakupata cipanje cejinji.

¹⁶³ Ngusaŵengana nawo ŵandu ŵa unami, nambo nguganonyela malamusi gawo.

¹⁶⁴ Ngusinalumba ŵalakwe kasano ni kaŵili pa lisiku, ligongo lya majiganyo gawo gagoloka.

¹⁶⁵ Ŵandu ŵakuganonyela malamusi gawo akuŵa ni mtendele wejinji; pangali cine cakwagwisya.

¹⁶⁶ Ngukulupilila kuti tacingulupusya, ŵalakwe AMBUJE; ni ngutenda yakundamula ŵalakwe kuti niyitende.

¹⁶⁷ Umi ŵangu ukugasunga malamusi gawo; pakuŵa nguganonyela ni mtima ŵangu wosope.

¹⁶⁸ Ngugasunga malamusi gawo ni majiganyo gawo, pakuŵa akuyiwona yosope yingutenda.

Lipopelo lyakuŵenda cikamucisyo

¹⁶⁹ Kulila kwangu kwayicilile ŵalakwe AMBUJE. Ambe lunda lwakupikanicisya, mpela mwa maloŵe gawo ga cilanga gala.

¹⁷⁰ Kuŵenda kwangu kupikanice kwa ŵalakwe. Angulupusye mpela mwa maloŵe gawo ga cilanga gala.

¹⁷¹ Pakamwa pangu tipacalumba ŵalakwe, ligongo akunjiganya maloŵe gawo.

¹⁷² Tinjijimba nyimbo jakutogolela maloŵe gawo, pakuŵa malamusi gawo gosope gali gagoloka.

¹⁷³ Mkono wawo uŵe tayale kungamucisya, ligongo ngugakuya malamusi gawo.

¹⁷⁴ Ngusosa cikulupusyo cawo, ŵalakwe AMBUJE; pakuŵa malamusi gawo gakusangalasya.

¹⁷⁵ Angunde kuŵa jwacijumi, kuti nalumbeje ŵalakwe, majiganyo gawo gangamucisyeje.

¹⁷⁶ Ngamba kulijendela mpela ngondolo jesokonecelele; myoyo ayice kukundolesya; une jwakutumicila jwawo, ligongo ngingugaliŵalila malamusi gawo.