Masalimo 118 - Chiyawo Bible

Lipopelo lyakutogolela ligongo lyakupunda

¹ Mwatogolele AMBUJE,* pakuti ŵambone, soni cinonyelo cawo cili cangamala.

² Aisilayeli asale kuti, “Cinonyelo cawo cili cangamala kwa yaka yosope.”

³ Liŵasa lya Aloni* lisale kuti, “Cinonyelo cawo cili cangamala kwa yaka yosope.”

⁴ Ŵandu ŵele ŵakwajogopa AMBUJE asale kuti, “Cinonyelo cawo cili cangamala kwa yaka yosope.”

⁵ Pandaŵi jinaliji myisawusyo napopesile kwa AMBUJE, ni Jwalakwe ŵatyosisye yisawusyo yangu.

⁶ AMBUJE pakutama kumbali jangu ngangusajogopa, ana mundu mpaka andende cici?

⁷ AMBUJE ali kumbali jangu kuti angamucisye, tinjawona amagongo ŵangu ali mkupundidwa.

⁸ Kutilila kwa AMBUJE kuli kwambone, kupundana ni kumkulupilila mundu.

⁹ Kutilila kwa AMBUJE kuli kwambone, kupundana ni kulupilila ayimwene.

¹⁰ Amagongo ŵangu asyungulile une, nambo tinjajonanga mwamacili ga AMBUJE.

¹¹ Ŵasyungulile une mbali syosope, nambo najonasile jemanjajo ni macili ga AMBUJE!

¹² Ŵasyungulile mpela nyuci, nambo ŵasimile mpela moto wa miŵa; kusyene tinjajonanga mwamacili gawo AMBUJE.

¹³ Ŵandutile mnope kwakuti ngagwile, nambo AMBUJE ŵangamwisye.

¹⁴ AMBUJE akusalimbikasya ni kumba macili, angulupwisye une.

¹⁵ Mpikane masegwe ga kupunda ku matenti ga ŵandu ŵa Mlungu: “Macili ga AMBUJE gatesile yeleyo,

¹⁶ mkono wamlyo wa AMBUJE upundile, mkono wamlyo wa AMBUJE upundile mwamacili.”

¹⁷ Ngisimbwa nambo tinjiŵa ni umi, tinjilalicila masengo gawo AMBUJE.

¹⁸ Ambele cilango cakogoya, AMBUJE, nambo nganandeka kuti mbwe.

¹⁹ Ambugulile milango jagoloka ja Nyumba jawo AMBUJE, kuti njinjile ni kwatogolela AMBUJE.

²⁰ Aci ni cipata cawo AMBUJE; ŵandu ŵagolokape tacijinjilila pelepa.

²¹ Ngwatogolela ŵalakwe pakuŵa anjanjile, ni ŵalakwe ali mkulupusyo jwangu.

²² Liganga lyele ŵakutaŵa nyumba ŵalikanile, lilyolyo lisandwice kuŵa liganga lya pandumba.*

²³ AMBUJE ni juŵatesile yeleyi, yeleyi yili yakusimonjeka pameso petu.

²⁴ Lelo ni lisiku liŵalipanganyisye AMBUJE; kwende tusecelele ni kusengwa pa lyele lisikuli.

²⁵ Atukulupusye, tukwacondelela, ŵalakwe AMBUJE. Tukwacondelela, ŵalakwe AMBUJE, kuti yindu yitujendele cenene.

²⁶ Jwana upile jwele jwakwisa mu lina lya AMBUJE; tukumsosela upile ŵa ku tyocela m'Nyumba ja AMBUJE.

²⁷ AMBUJE ali Mlungu, atupele uwe lilanguka. Ni nyambi m'makono mwenu, mcitande cindimba, mjende mpaka kuja kusyungulila malo gakupelecela mbopesi.

²⁸ Ŵalakwe ali Mlungu jwangu, tinjatogolela. Ŵalakwe ali Mlungu jwangu, tinjalumba.

²⁹ Mwatogolele AMBUJE, pakuŵa ali ŵambone; pakuŵa cinonyelo cawo cili cangamala.