Masalimo 116 - Chiyawo Bible

Mundu jwakulupuka ku ciwa akumlumba Mlungu

¹ Ngwanonyela AMBUJE,* ligongo agapikene maloŵe gangu ni kupopela kwangu.

² Jwalakwe akutejela mapikanilo kuti ambikane, ligongo tinjaŵenda ndaŵi syosope panguŵa ni umi.

³ Ngonji sya ciwa syasyungwilile une, yipwetesi ya ku cilambo ca ŵandu ŵawe yingwilile une. Nalasile ni wangamwile woga.

⁴ Napopesile pakulikolanga lina lya AMBUJE kuti, “AMBUJE, ngwacondelela, awukulupusye umi ŵangu.”

⁵ AMBUJE ali ŵambone mtima, ni ŵagoloka, Mlungu jwetu ali jwa canasa.

⁶ AMBUJE akusiŵasunga ŵandu ŵa mtima ŵakulitulusya. Pinaliji myisawusyo yekulungwa; AMBUJE ŵangulupwisye.

⁷ Ujilani ku malo genu gakupumulila, m'mwe umi ŵangu; pakuŵa AMBUJE amtendele m'mwejo yambone.

⁸ Pakuŵa ŵalakwe AMBUJE awukulupwisye umi ŵangu kuciwa, ajilekasisye misosi jangu, asacile kuti ngakuŵala.

⁹ Ngwenda pameso pa AMBUJE; mcilambo ca ŵandu ŵacijumi.

¹⁰ Nakulupilile ŵalakwe atamose natite, “Ndili myisawusyo yekulungwa.”

¹¹ Pinatendaga woga, natite, “Ŵandu wosope ali ŵangakulupicika.”

¹² Tinawucisye cici AMBUJE, kwa yindu yambone yosope yandendele?

¹³ Tinjiwukwesya mgawo wa cikulupusyo, ni kupopela pakulikolanga lina lya AMBUJE.

¹⁴ Tinayitende yinalumbile kwa AMBUJE; pameso pa ŵandu ŵakwe wosope.

¹⁵ Ciwa ca ŵandu ŵaswela mtima wa AMBUJE, cili ca mtengo wapenani mnope pameso pakwe.

¹⁶ Une ndili jwakutumicila jwawo, ŵalakwe AMBUJE, mwanace jwa jwakutumicila jwawo jwamkongwe. Ŵalakwe angopwele unyolo wangu.

¹⁷ Tinjipeleka kwa ŵalakwe mbopesi jakutogolela, ni kupopela pakulikolanga lina lyawo.

¹⁸ Tinjitenda yinalumbile kwa AMBUJE, pameso pa ŵandu ŵakwe wosope,

¹⁹ ŵakusimanikwa m'Nyumba ja AMBUJE, ni mu msinda ŵa Yelusalemu. Tinjapa ŵalakwe yele yindesile cilanga.* Mwalumbe AMBUJE!