Masalimo 115 - Chiyawo Bible

Mlungu jumo jwakuwona

¹ Ngaŵa kwetuwe, AMBUJE,* ngaŵa kwetuwe, nambo kwa ŵalakwe jika kuŵe lumbili, ligongo ŵalakwe ali AMBUJE ŵakulupicika ni ŵa cinonyelo cangamala.

² Ligongo cici ngosyo sine sya ŵandu sikusati, “AMBUJE ŵenu ali kwapi?”

³ AMBUJE ŵetu ali kwinani; akusatenda cilicose cakusaka.

⁴ Milungu jawo japanganyidwe ni silifa* ni golidi,* ni makono ga ŵandu.

⁵ Pakamwa yikwete, nambo ngayikuŵeceta; yana meso nambo yangalola.

⁶ Yana mapikanilo, nambo ngayikupikana; yana mbula nambo ngayikunucisya.

⁷ Yikwete makono, nambo payikukwaya ngayikupikana kandu; yikwete sajo nambo ngayikwenda; ni ngayikukoposya liloŵe.

⁸ Ŵandu ŵele ŵakuyipanganya akulandana nayo; ni wosope ŵene ŵakuŵika cikulupi pa yeleyo.

⁹ M'mwe Isalaeli mwakulupilile AMBUJE, AMBUJE ali ŵakumkamucisya ni ŵakumcenjela.

¹⁰ M'mwe liŵasa lya Aloni,* mwakulupilile AMBUJE, AMBUJE ali ŵakumkamucisya ni ŵakumcenjela

¹¹ Jemanja ŵakumjogopa AMBUJE, mumkulupilile. AMBUJE ali ŵakumkamucisya ni ŵakumcenjela.

¹² AMBUJE akutukumbucila ni tacitupa upile. Tacapa upile ŵandu ŵa ku Isalaeli; tacipeleka upile ku liŵasa lya Aloni.

¹³ Tacapa upile ŵele ŵakumcimbicisya, ŵakumanyika ni ŵangamanyika ŵakwe.

¹⁴ AMBUJE ampe ŵanace, m'mwejo ni yisukulu yenu!

¹⁵ AMBUJE ampe upile, ŵele ŵiŵapanganyisye kwinani ni cilambo capasi.

¹⁶ Kwinani kuli kwa AMBUJE, nambo cilambo capasi ŵacipelece kwa ŵandu.

¹⁷ Ŵandu ŵawe, kapena mundu jwalijose jwakutulucila ku cilambo ca ŵandu ŵawe ngakwalumba AMBUJE.

¹⁸ Nambo uwe, tucalumba AMBUJE kutandilila sambano mpaka yaka yosope. Mwalumbe AMBUJE!