Masalimo 113 - Chiyawo Bible

Kuwulumba umbone ŵa AMBUJE

¹ Mwalumbe AMBUJE!* Jemanja ŵakutumicila ŵawo AMBUJE, mlilumbe lina lyakwe.

² Lina lya AMBUJE licimbicikwe, kutandilila sambano mpaka yaka yosope.

³ Kutyocela kungopoko lyuŵa mpaka kungapilo lyuŵa. Alilumbe lina lyawo AMBUJE.

⁴ AMBUJE akulamulila ŵandu ŵa ngosyo syosope, lumbili lwawo luli lwalukulungwa kukupunda kwinani.

⁵ Pangali jwakulandana ni AMBUJE Mlungu jwetu. Jwakutama kwinani,

⁶ nambo akusajinamila pasi, ni kulola mwipananga ni cilambo capasi.

⁷ Akusamkwesya mundu jwakulaga kutyocela ku luwundu, ni akusiŵatyosya ku citutu ŵandu ŵakulaga,

⁸ akusiŵatamika pampepe ni ayimwene, ayimwene ŵa ŵandu ŵakwe.

⁹ Akusampa liŵasa jwamkongwe jwangaŵeleka, akusamtenda kuŵa jwam'masyeto jwa kusangalala jwana ŵanace. Mwalumbe AMBUJE!