Masalimo 112 - Chiyawo Bible

Lukondwa lwa mundu jwambone

¹ Mwalumbe AMBUJE!* Jwana upile mundu jwakwajogopa AMBUJE. Jwakunonyela kusunga malamusi gakwe.

² Yisukulu yakwe tiyiciŵa yamacili pa cilambo capasi; ŵanace ŵa mundu jwagoloka mtima taciŵa ŵana upile.

³ Liŵasa lyakwe tiliciŵa lyakusicila ni lyana cipanje, ni kulupicika kwakwe tikuciŵa kwa yaka yosope.

⁴ Lilanguka likusam'mulicila mundu mcipi jwagoloka mtima, ni kwa ŵandu ŵa canasa, ŵagoloka, ni ŵambone mtima

⁵ Mundu jwakukongosya mwangasosa kupata, jwakwendesya masengo gakwe mwagolosya, yindu yikusamjendela cenene.

⁶ Pakuŵa mundu jwagoloka ngasatenganyika kose; ngasamliŵalila kwa yaka yosope.

⁷ Ngakusajogopa ali apikene ngani syakusakala syasitendekwe. Mtima wakwe ukasaŵa wawutamilicice, akusamkulupilila AMBUJE.

⁸ Ali jwakulimba mtima, ngasajogopa kose, mpaka tacawona amagongo ŵakwe ali alepele.

⁹ Akusapeleka cikamucisyo mwa lulele, akasapeleka mwakoloŵa magasa kwa ŵandu ŵakulaga, kulungamika kwakwe tikuciŵa kwa yaka yosope, taciŵa jwamacili, ŵandu tacimpa ucimbicimbi.

¹⁰ Mundu jwangalumbana akusayiwona yeleyi, ni akusapya nayo mtima. Akusalilumanya meno. Lisosa lya mundu jwangalumbana ngasilitendekwa kose.